25-vjeçari Marjan Këdheli, i cili mesditën e të martës vrau me thikë babain e tij, 69-vjeçarin Pjetër Këdheli, në banesën e tyre në fshatin Shkallnur, ka dalë këtë të shtunë para Gjykatës së Durrësit, e cila i ka caktuar masën e sigurisë “arrest me burg”.
Gjykata i ka caktuar një avokat kryesisht pasi familjarët nuk kanë paraqitur asnjë mbrojtës për të. Avokatja ka kërkuar të bëhet një vleresim mjeko-ligjor për shëndetin mendor të të riut.
Siç mund ta shihni dhe në videon e mëposhtme, i riu shfaqet i qetë dhe i buzëqeshur para togave të zeza.
.
Fillimisht ishte organi i akuzës që tregoi të gjithë dinamikën e ngjarjes së regjistruar më 28 tetor. Nga këqyrja e vendit të ngjarjes ka rezultuar se krimi ka ndodhur në katin e parë të banesës, në ambientet e kuzhinës.
Viktima ka marrë dy plagë në kokë dhe pesë plagë në trup, ndërkohë që janë konstatuar edhe plagë të lehta në formë gërvishtjesh. Thika me të cilën është kryer vrasja është gjetur në vendngjarje, së bashku me një shufër hekuri.
“Është marrë dëshmia e Valentinës, bashkëshortes së viktimës, e cila ka treguar se Marjani gjatë ditës ishte i mërzitur. Në momentin që ajo ka dalë jashtë për t’u kujdesur për bagëtitë, ka dëgjuar britmat e Pjetrit dhe më pas është kthyer në banesë, ku ka parë Marjanin duke e goditur të atin me thikë në trup”, deklaroi prokuroria.
Sipas organit të akuzës, autori i ngjarjes ka deklaruar se një javë më parë i kishte vdekur gjyshja dhe se i ati i kishte kërkuar që të angazhohet në pritjen e njerëzve dhe të ketë kujdes me pagesat.
“Ai i ishte përgjigjur “këtu jam”, ndërsa shikonte telefonin. Në atë moment, i ati e kishte kapur për fyti dhe ai ishte ndjerë i bllokuar. Aty pranë kishte kapur një thikë dhe kishte goditur të atin. Pasi ishte larguar nga banesa, ishte kthyer sërish për të marrë celularin. Meqë e ëma i kishte hequr thikën nga dora, ai kishte marrë një shufër hekuri dhe e ka goditur sërish të atin dy herë të tjera, përpara se të merrte celularin dhe të largohej përfundimisht nga banesa”, tha prokuroria.
Ndërkohë, gjatë seancës i riu ka deklaruar: “Nuk jam dakort për pjesën e rrezikshmërisë. Mua po më sulmonin, nuk e di kush e ka sulmuar. Mund të ketë qenë dikush tjeter që e ka sulmuar. Me vjen shumë keq që jam këtu për nje situatë të tillë. Mbase bejmë nje senacë tjeter kur te jem më i qetë. Unë nuk jam njeri agresiv, jam marë punë të ndershme në ndërtim.”
“Ndjejmë keqardhje për ngjarjen. Marjani ende nuk i kupton veprimet që ka kryer. Kërkojmë të bëhet një akt ekspertimi mjeko ligjor psikik”, ka deklaruar avokatja.
Në dëshminë e dhënë më herët para grupit hetimor, i riu ka deklaruar se prej vitesh jetonte jashtë vendit dhe se në Shqipëri, ishte kthyer 6 muaj më parë. Sipas tij, prej asaj kohe, ka patur konflikte të vazhdueshme me babain, ndërsa krimi ka ndodhur në momentin kur po konsumonin drekën.
“Ishim duke ngrënë bukë dhe babai mu turr. Nuk më linte të haja bukë i qetë. Por nuk e mbaj mend pse ndodhi. Por, kemi patur grindje të vazhdueshme që kur jam kthyer nga Grerqia, para 6 muajsh. Kam jetuar në Francë, jam me pasaportë franceze. Atje kam ndenjtur rreth 6 vite dhe më pas kam shkuar në Greqi, ku kam punuar 6 muaj. Nga Greqia kam ardhur në shtëpi dhe isha i papunë. Kemi patur debate me babain. Sherri ndodhi teksa hanim drekë. Nuk e di si ndodhi. Mora thikën dhe e qëllova.”
Burime bëjnë me dije se në momentin e ngjarjes ndodhej në banesë vetëm me babain dhe nënën e tij. Ka qenë kjo e fundit, e cila pas krimit ka lajmëruar Policinë.
Në dëshminë e dhënë për grupin hetimor, bashkëshortja e viktimës ka thënë se 25-vjeçari vuante nga probleme të shëndetit mendor dhe kishte sjellje agresive. Ndërkohë, fqinjët dhe familjarët e tjerë thonë se nuk e kanë hasur një gjë të tillë.
Sipas buriemeve, familjarët kanë dëshmuar se dy vite më parë, 25-vjeçari kishte shkuar në spital për t’u vizituar dhe mjekët e kishin rekomanduar që të shkonte të vizitohej nga një mjek psikiatër. Por, nuk ka pranuar as i riu dhe as babai i tij, me pretendimin se i biri nuk ishte në situatën për psikiatër. Burime bëjnë me dije se nuk ekziston asnjë dokument apo kartele që konfirmon problemet e shëndetit mendor të autorit.
Familja Kodheli është me origjinë nga Mirdita dhe prej vitesh jetonte në fshatin Shkallnur, ndërsa fëmijët e tjerë të familjes jetonin jashtë vendit.
