Një shpërthim me tritol ka ndodhur sot në Shkodër, ku një person ka mbetur i plagosur.
Ngjarja ndodhi në rrugën “Arra e Madhe” të qytetit, ku lënda plasëse ishte vendosur në një mjet të parkuar.
I plagosur është shtetasi Enea Buzukja, punonjës i Drejtorisë së Tatimeve në Shkodër, i cili është transportuar për në spital dhe ndodhet jashtë rrezikut për jetën.
Mësohet se lënda plasëse është vendosur në një motor të parkuar afër automjetit me të cilin do lëvizte Busukja.
Sapo punonjësi i tatimeve ka dashur që të hipë në automjetin e tij, ka ndodhur shpërthimi i motorit që ka sjellë edhe plagosjen e tij.
Nga pamjet shihet dera e garazhit pranë mjetit ku ndodhi shpërthimi e shkatërruar, si edhe një motor i dëmtuar në tokë.
Njoftimi:
Rreth orës 11:35, në lagjen “Ndoc Mazi”, në momentin që shtetasi E. B. ka ndezur automjetin e tij, ka shpërthyer një sasi lënde plasëse në automjet.
Si pasojë është dëmtuar shtetasi E. B., 38 vjeç, i cili është dërguar në spital dhe aktualisht është jashtë rrezikut për jetën.
Grupi hetimor, në drejtimin e Prokurorisë, po kryen veprimet për zbardhjen e rrethanave të rastit, identifikimin dhe kapjen e autorit/ëve.
