Kreu i Prokurorisë së Posaçme Antikorrupsion (SPAK), Altin Dumani, raportoi sot në Kuvend për aktivitetin e institucionit gjatë vitit 2024 dhe problematikat e hasura në punën e përditshme.
Dumani theksoi se, megjithë përparimet në luftën kundër korrupsionit dhe krimit të organizuar, numri i referimeve nga institucionet publike mbetet i ulët, duke vënë në dukje mungesën e denoncimeve për çështje të korrupsionit dhe shpërdorimit të detyrës.
“Mbetet i ulët numri i referimeve nga institucionet publike për çështjet e korrupsionit dhe shpërdorimit të detyrës”, tha Dumani mes të tjerash.
Sipas raportit, gjatë vitit 2024 SPAK ka sekuestruar pasuri me vlerë rreth 36,7 milionë euro, duke përfshirë edhe pasuri në kriptovaluta, përmes hetimeve komplekse brenda dhe jashtë vendit. Krahasuar me vitin 2023, kjo përfaqëson një rritje prej rreth 59,7% të vlerës totale të pasurive të sekuestruara dhe të konfiskuara.
“SPAK i ka dhënë një rëndësi të veçantë hetimit pasuror dhe financiar. Në këtë kontekst, është forcuar Sektori i Hetuesve Financiarë nëpërmjet ngritjes së kapaciteteve njerëzore kryesisht në hetimet financiare dhe pasurore me veprime komplekse brenda dhe jashtë vendit ku përfshihen edhe veprimet me kriptovaluta. Gjatë vitit 2024, me asistencën e ekspertëve ndërkombëtarë është finalizuar nxjerrja e një udhëzimi të përgjithshëm për masat administrative dhe procedurale për kryerjen e hetimit financiar dhe pasuror në SPAK. Ndërkohë që për pasuritë e konfiskuara kjo vlerë arrin në shumën rreth 36,7 milionë euro. Kështu, vlera e pasurive të sekuestruara zë rreth 43,8% të vlerës totale, ndërsa pasuritë e konfiskuara zënë rreth 56,2% të vlerës totale. Krahasuar gjithashtu me vitin 2023, vihet re një rritje në masën rreth 59,7% e vlerës totale të pasurive të sekuestruara dhe të konfiskuara (rreth 65,5 milion euro në vitin 2024 kundrejt rreth 41 milion euro në vitin 2023)”, tha ai.
