Kreu i Prokurorisë së Posaçme (SPAK), Altin Dumani, ka raportuar sot në Kuvend për ecurinë e hetimeve mbi çështjen e inceneratorëve, duke iu përgjigjur pyetjeve të deputetes së PD-së, Jorida Tabaku.
Në fokus të deklaratës së tij ishte edhe ish-ministri Arben Ahmetaj, aktualisht në kërkim ndërkombëtar për disa vepra penale.
Dumani u shpreh qartë duke thënë: “Deklarimet publike të tij vlerësohen rast pas rasti, për ne sot ai është person në kërkim ndërkombëtar për disa vepra penale. Në çdo moment që një subjekt dëshiron të bëhet bashkëpunëtor i drejtësisë është mëse i mirëpritur.”
Kjo deklaratë vjen në një kohë kur hetimet për inceneratorin e Tiranës janë ende në fazë paraprake, ndërsa për Fierin dhe Elbasanin proceset gjyqësore kanë përfunduar dhe janë konfirmuar nga gjykatat.
Lidhur me pyetjen se pse nuk është marrë i pandehur ende Veliaj, ai deklaroi se hetimet paraprake nuk kanë përfunduar dhe vijojnë akoma për inceneratorin e Tiranës.
