Të dielën, më 26 tetor, në orën 10:00, Kuvendi i Kosovës do të mblidhet për seancën vendimtare që do të përcaktojë nëse Albin Kurti do të arrijë të formojë qeverinë e re.
Kreu i Lëvizjes Vetëvendosje është mandatuar nga presidentja Vjosa Osmani më 11 tetor për të paraqitur programin dhe kabinetin e tij, por deri tani nuk ka siguruar shumicën e nevojshme parlamentare.
Burime nga partitë opozitare bëjnë të ditur se nuk ka pasur asnjë takim mes Kurtit dhe përfaqësuesve të tyre për ndonjë marrëveshje koalicioni. Aktualisht, Vetëvendosja ka vetëm 56 vota – 48 nga deputetët e saj dhe 8 nga minoritetet joserbe – pesë më pak se numri minimal prej 61 votash që kërkohen për formimin e qeverisë.
Kryetari i PDK-së, Memli Krasniqi, ka qenë i prerë se partia e tij nuk do të mbështesë një qeveri Kurti 3. Të njëjtin qëndrim ka mbajtur edhe kryetari i LDK-së, Lumir Abdixhiku, duke theksuar dallimet e thella me Vetëvendosjen. Nga ana tjetër, Ramush Haradinaj i AAK-së ka thënë se mbështet idenë e një “qeverie të opozitës”, ndërsa Fatmir Limaj i Nismës Socialdemokrate ka paralajmëruar votë kundër, për sa kohë Dimal Basha mbetet kryetar i Kuvendit.
Nëse Kurti dështon të formojë qeverinë të dielën, Kushtetuta e Kosovës parashikon që një shumicë e dytë parlamentare ka dhjetë ditë kohë për ta provuar. Por PDK, si forca e dytë politike, ka paralajmëruar se nuk do t’i kërkojë presidentes një mandat të dytë, çka praktikisht hap rrugën për zgjedhje të reja të parakohshme.
