Nga Boldnews.al
Nëse e sheh Shqipërinë vetëm nga “Kopshti i Edenit” 4 milionë euro në Kryeministri, mund të besosh fjalët e Edi Ramës se Shqipëria është gati për të hyrë në Bashkimin Europian.
Madje, paqja në atë oaz të nxit të besosh fjalët e kryeministrit se vendi ynë i ka përmbushur tre herë kushtet për të qenë pjesë e familjes së zhvilluar europiane, por disa “skeptikë të pandreqshëm” në Bruksel nuk duan të shohin realitetin e artë të Shqipërisë.
Por, vetëm 10 kilometra distancë nga zyra e kryeministrit, në fshatin Laknas, në rrugën për në aeroportin e vetëm ndërkombëtar, “Shqipëria Europiane” të përplaset në fytyrë.
Në redaksinë e “Boldnews.al” ka mbërritur një video, e xhiruar në mënyrë amatore nga një qytetar. Cilësia e filmimit është larg teknologjisë së lartë të propagandës qeveritare, por është e vërteta lakuriqe e realitetit shqiptar.
VIDEO
Rruga “Shkëndija”, nëse me të vërtetë mund të quhet rrugë, është një vijë e gjatë, e mbushur me gropa me ujë, vetëm pak metra larg rrugës kryesore të aeroportit.
Në të dy krahët e asaj që quhet rrugë, janë të varur në mënyrë skandaloze telat që përcjellin energjinë elektrike. Ata përcjellës të rrezikshëm mbahen në fije të perit në disa hunj, që luajnë rolin e shtyllave.
Qytetari denoncues, me të drejtë, ngre alarmin se gjendja e asaj rruge dhe ato tela elektrikë të lënë në mëshirë të fatit, janë një rrezik serioz për jetën e banorëve të zonës.
I shqetësuar në kulm për situatën në rrugën “Shkëndija”, qytetari nga Laknasi thotë se ka njoftuar shpesh autoritetet vendore për të përmirësuar gjendjen, por sidomos për të shmangur aksidentet tragjike me hunjtë-shtylla të elektrikut.
Apelet kanë rënë në vesh të shurdhër. Madje, për qeverinë dhe autoritetet vendore, do të ishte më mirë që ajo rrugë të mos ekzistonte as formalisht. Ajo prish dekorin e vështruar nga Kopshti i Edenit.
