Rreth 350 familje që jetojnë në një kompleks pallatesh në zonën e “Kodrës së Diellit” në Tiranë po përballen me mungesën e ujit të pijshëm prej më shumë se tre muajsh.
Banorët raportojnë se uji vjen vetëm një herë në 24 orë dhe qëndron për një kohë shumë të shkurtër, duke mos përmbushur as nevojat minimale për higjienë dhe gatim.
Që prej muajit gusht, autobotet janë bërë burimi kryesor i ujit për banorët, por sasia që shpërndahet nuk mjafton. “Autoboti vjen, por për 300 e ca familje nuk mjafton as për 10 minuta,” thotë një banor. Të detyruar, qytetarët blejnë ujë dhe mbushin bidona e enë të ndryshme për përdorim ditor.
Banorët shprehen të zhgënjyer nga mungesa e reagimit të ndërmarrjes së Ujësjellës Kanalizimeve Tiranë (UKT).
“Faturat i paguajmë rregullisht, por ujë nuk kemi,” thotë një tjetër qytetar.
Edhe thirrjet në numrat e kontaktit të UKT nuk kanë sjellë zgjidhje. “Na thonë do vijë uji për 30 minuta, por është gënjeshtër,” shprehet një banor i irrituar.
Problemi nuk kufizohet vetëm në “Kodrën e Diellit”. Në shumë zona të kryeqytetit, banorët raportojnë se kanë ujë vetëm për një orë në ditë.
Pensionistët, të sëmurët dhe familjet me fëmijë janë më të prekurit nga kjo krizë. “Pa ujë nuk ka jetë,” thotë një zonjë, duke përshkruar se si lahen me kanoçe dhe ujë të ngrohur nga dielli.
