Ka ndërruar jetë në moshën 71-vjeçare analisti dhe eksperti i njohur amerikan i çështjeve ndërkombëtare, Janusz Bugajski, një nga zërat më të njohur në analizat mbi Europën Lindore dhe Ballkanin.
Lajmi i hidhur u bë i ditur nga ish-drejtori i “Zërit të Amerikës”, Elez Biberaj, i cili në një postim publik shprehu tronditjen dhe dhimbjen për humbjen e mikut dhe kolegut të tij të ngushtë.
“Jam i tronditur dhe thellësisht i trishtuar kur mësova për ndarjen nga jeta të mikut dhe kolegut tim të ngushtë, Janusz Bugajski. Ai ishte një analist i shkëlqyer i çështjeve euroaziatike, autor i shumë veprave që ndikuan ndjeshëm në kuptimin tonë të rajonit dhe një mbrojtës i vendosur i demokracisë, qeverisjes së mirë dhe lirisë së shtypit”, shkroi Biberaj.
Në reagimin e tij, Biberaj kujton bashkëpunimin e gjatë me Bugajskin në projekte të shumta që lidhen me zhvillimet politike dhe shoqërore në rajonin e Ballkanit.
“Gjatë viteve kemi punuar së bashku në shumë projekte, veçanërisht në çështjet e Ballkanit. Fillova ta admiroja jo vetëm për intelektin e tij, por edhe për integritetin, humorin dhe përkushtimin e palëkundur ndaj vlerave që ai i vlerësonte shumë. Mungesa e tij do të ndihet thellë nga të gjithë ne që patëm privilegjin ta njihnim dhe të punonim me të. U prehsh në paqe, Janusz”, shkruan Biberaj.
