Edhe pse mandati i saj si Avokate e Popullit ka përfunduar që në mars të vitit 2022, Erinda Ballanca ka dalë publikisht në mbështetje të qeverisë, duke i bashkuar qëndrimet e institucionit të Avokatit të Popullit me ato të Ministrisë së Shëndetësisë për projektligjin “Për barazinë gjinore”.
Në një postim në faqen zyrtare të Facebook-ut të Avokatit të Popullit, institucioni, i cili duhet të veprojë në mënyrë të pavarur, i bashkangjitet Ministrisë së Shëndetësisë, duke u shfaqur më shumë si zë i politikës së qeverisë sesa si mbrojtës i pavarur i të drejtave të qytetarëve.
Ndërkohë, Komisioni i Ligjeve ka shpallur vakancën për pozicionin e Avokatit të Popullit, duke i dhënë mundësinë interesuarve të depozitojnë dokumentacionin e nevojshëm për kandidim brenda 20 ditëve.
Reagimi i Avokatit të Popullit
Avokati i Popullit ka ndjekur me vëmendje debatin publik të ditëve të fundit lidhur me projektligjin “Për barazinë gjinore”, nismë ligjore e ndërmarrë nga Ministria e Shëndetësisë dhe Mirëqenies Sociale.
Prej vitesh, Avokati i Popullit ka përcjellë rekomandime të njëjta me ato të Komitetit për Eliminimin e Diskriminimit ndaj Grave (CEDAW) dhe të grupit të ekspertëve GREVIO, duke theksuar nevojën për përmirësimin e kuadrit ligjor për barazinë gjinore, me synim harmonizimin e mëtejshëm të legjislacionit shqiptar me standardet ndërkombëtare.
Avokati i Popullit dëshiron të nënvizojë se barazia gjinore nuk është një kauzë ideologjike apo politike, por një e drejtë themelore e njeriut, e garantuar nga Kushtetuta e Republikës së Shqipërisë, nga konventat ndërkombëtare që vendi ka ratifikuar, si dhe nga detyrimet që burojnë nga procesi i integrimit evropian, i cili kërkon përputhje të plotë me acquis communautaire në fushën e barazisë dhe mosdiskriminimit.
Në këtë kuadër, Avokati i Popullit mbështet nismën ligjore të Ministrisë së Shëndetësisë dhe Mirëqenies Sociale, duke vlerësuar faktin se projektligji është përgatitur përmes një procesi gjithëpërfshirës konsultimesh.
Ndërkohë, Avokati i Popullit shpreh shqetësim për mënyrën si është zhvilluar debati dhe procesi përfundimtar i këtij ligji, që mund të sjellë zbehjen e garancive për barazinë gjinore apo devijimin nga parimet fillestare mbi të cilat është ndërtuar nisma.
Çdo riformulim që kufizon përkufizimet, mekanizmat ose detyrimet institucionale për garantimin e barazisë, përbën një hap pas në raport me standardet ndërkombëtare që Shqipëria është zotuar t’i respektojë.
Përparimi në fushën e barazisë gjinore është një nga kriteret themelore të respektimit të të drejtave të njeriut dhe një tregues kyç në procesin e integrimit evropian.
Avokati i Popullit mbetet i angazhuar të kontribuojë me ekspertizë dhe vëzhgim të vazhdueshëm në çdo proces që lidhet me përmirësimin e kuadrit ligjor për barazinë gjinore dhe të drejtat e njeriut në vend.
