Dy persona janë arrestuar dhe një tjetër është shpallur në kërkim pas një ngjarjeje të ndodhur në fshatin Trush të Shkodrës, ku u qëllua me armë gjahu në ajër, në afërsi të një banese.
Ngjarja dyshohet të ketë ndodhur për motive të dobëta, ku shtetasi Ç. M., 56 vjeç, dhe dy djemtë e tij, D. M., 22 vjeç, dhe E. M., 27 vjeç, kanë qëlluar në ajër për të kanosur fqinjin e tyre, shtetasin P. N. Si pasojë e veprimeve të kryera, Ç. M. dhe D. M. u kapën në flagrancë dhe u vunë në pranga, ndërsa E. M. është shpallur në kërkim.
Gjatë kontrollit, u sekuestruan dy armë gjahu çifte, të cilat rezultojnë të jenë me leje. Po vijojnë hetimet për gjetjen e armës së zjarrit që dyshohet të jetë përdorur në ngjarje.
Materialet procedurale janë referuar në Prokurorinë pranë Gjykatës së Shkallës së Parë të Juridiksionit të Përgjithshëm Shkodër për veprime të mëtejshme.
