Policia greke ka vënë në pranga 27-vjeçarin shqiptar Ylli Shkalla, i cili ishte arratisur më 18 shtator nga burgu i Kasandrës në Halkidiki.
Sipas mediave greke, Shkalla u lokalizua dhe u arrestua në një parking në autostradën Pathe, në drejtim të Selanikut. Ai ndodhej brenda një makine të vjedhur, që mësohet se i përkiste ish-pronarit të tij.
Gjatë kontrollit, oficerët i gjetën një pistoletë dhe një telefon celular, të cilat u sekuestruan së bashku me automjetin. Pas arrestimit, i riu u shoqërua drejt ambienteve të sigurisë për procedurat e mëtejshme ligjore.
Ylli Shkalla ishte dënuar më herët me 7 vite e 6 muaj burg nga drejtësia greke për transport të emigrantëve të paligjshëm, ndërsa nuk është hera e parë që përballet me ligjin.
Në shkurt të vitit 2017, ai ishte arrestuar edhe në Tiranë për 9 raste vjedhjesh në bashkëpunim.
