Policia e Korçës, e drejtuar nga Erion Ahmeti, duket se e ka marrë seriozisht goditjen e krimit, ku sot ka dhënë lajmin se ka sekuestruar një lepur të vrarë.
Më konkretisht, në Maliq, ka kapur tre veta që dyshohet se po kryenin gjueti të paligjshme, dhe pranë tyre dhe lepurin e vrarë, të cilin ua ka sekuestruar. Gjithashtu, u ka bllokuar edhe një armë gjahu, si dhe u ka hequr lejën për mbajtjen e saj, si pasojë e shkeljes së moratoriumit.
“Gjatë kontrolleve, në vendin e quajtur “Burimi i Selcës”, Maliq, janë kapur në flagrancë 3 shtetas që po kryenin gjueti të paligjshme në këtë zonë. Në këtë vend u gjet një kafshë e egër, e vrarë me armë gjahu.” – thuhet në njoftimin e Policisë.
Ndërkohë janë proceduar penalisht në gjendje të lirë për shtetasit D. A., 31 vjeç, banues në Maliq, L. D., 20 vjeç dhe M. T., 23 vjeç, banues në fshatin Libonik për veprën penale “Keqtrajtimi i kafshëve”.
Materialet proceduriale i janë referuar Prokurorisë së Korçës, për veprime të mëtejshme.
