Një zhvillim i ri ka ndodhur në çështjen ligjore që përfshin pasurinë e legjendës së muzikës pop, Michael Jackson. Sipas dokumenteve të publikuara më 9 tetor, vajza e tij, Paris Jackson, ka përfituar rreth 55 milionë euro nga pasuria e babait të saj, pas një beteje të gjatë ligjore me ekzekutorët e fondit të trashëgimisë.
Sipas revistës People, dokumentet tregojnë se Paris mori shumën e majme si pjesë e një marrëveshjeje të brendshme, pas ankesave që kishte bërë për mungesë transparence në administrimin e pasurisë dhe në shpërndarjen e fitimeve që rrjedhin nga marka “Michael Jackson”.
Ekzekutorët, nga ana tjetër, kanë mbrojtur mënyrën e menaxhimit të pasurisë, duke theksuar se ajo është shndërruar nga një aset me borxhe në një markë globale fitimprurëse, me vlerë që tashmë arrin mbi 2 miliardë euro.
Paris kishte ngritur më parë një peticion kundër disa pagesave të konsideruara prej saj si “dhurata të pajustifikuara” ndaj avokatëve, në vlerën e 600 mijë eurove. Por ekzekutorët kanë argumentuar se të gjitha pagesat ishin ligjore dhe të dokumentuara.
Ky konflikt familjar dhe financiar ka tërhequr vëmendje të madhe në botën e showbiz-it, duke u cilësuar si një nga betejat më të bujshme ligjore që lidhen me pasurinë e një ylli botëror.
