Kreu i grupit parlamentar të PD, Gazment Bardhi, gjatë një konference për shtyp, ka denoncuar një rast të dyshuar të konfliktit të interesit dhe shpërdorimit të detyrës brenda institucionit të Presidencës.
Sipas Bardhit, pas emërimit të Begajt si President, djali i tij 23-vjeçar është punësuar në një kompani sigurimesh në Shqipëri, e cila ka përfituar të gjitha tenderat e shpallur nga Presidenca në fushën përkatëse.
Ai deklaron se djali i Presidentit, i cili më parë ka pasur studime dhe punësime jashtë vendit, është punësuar në mënyrë të dyshimtë në këtë kompani, ku rezulton të ketë një pagë që është dyfishi i mesatares së pagave të punonjësve të tjerë.
Madje, ai renditet si i katërti me pagën më të lartë në kompani, pavarësisht moshës dhe përvojës së kufizuar.
Kompania në fjalë, sipas Bardhit, ka qenë 100% fituese e të gjitha tenderave të shpallur nga institucioni i Presidentit, duke ngritur dyshime serioze për një skemë të organizuar për përfitime të padrejta.
Bardhi e cilëson këtë situatë si një “gjendje permanente konflikti interesi”, që bie ndesh me nenet 11, 86, 88 dhe 89 të Kushtetutës së Republikës së Shqipërisë.
Bardhi ka paralajmëruar se do të depozitojë një kallëzim penal në SPAK, duke kërkuar hetim të plotë për këtë çështje.
“Në kundërshtim me nenin 11, 86, 88 dhe 89 të Kushtetutës ka krijuar një gjendje permanente konflikti interesi që cënon konkurrencën e lirë në treg, duke i dhënë përfitimet e të gjitha prokurimeve publike të institucionit të Presidentit në fushën përkatëse, kompanisë private ku është punësuar, i dyshuar në mënyrë fiktive, djali i tij, pas emërimit të Begaj si President.
Konkretisht, djali i Presidentit vetëm 23 vjeç rezulton me studime dhe punësime jashtë, rezulton se është i punësuar në një kompani sigurimesh në Shqipëri që rezulton me një pagë që është dyfishi i pagës mesatare i punonjësve në këtë kompani. Rezulton që është i 4 me pagën më të lartë në këtë kompani. Kjo kompani aplikon për të fituar tendera në institucionin e Presidentit që drejtohet nga babi i djali dhe rezulton se është 100% fituese e të gjitha tenderave në institucionin e Presidentit. Jemi para një krimi dhe korrupsioni”, tha Bardhi.
