Gjykata e Magjistraturës në Adelaide ka vendosur të pushojë akuzën për kultivim droge ndaj terapistes dhe influencueses shqiptare Belina Pupa, e cila ishte përballur me drejtësinë australiane pas gjetjes së 43 bimëve kanabisi në një pronë të regjistruar në emrin e saj.
Sipas dokumenteve gjyqësore, akuza për kultivim të lëndëve narkotike nuk do të ndiqet më, çka do të thotë se Pupa nuk shpallet fajtore dhe nuk do të dënohet për këtë çështje.
Megjithatë, procesi gjyqësor vijon për një tjetër akuzë që lidhet me ndërhyrje të paautorizuar në rrjetin elektrik, për të cilën seanca e radhës është caktuar më 25 nëntor 2025 në Gjykatën e Adelaide.
Sipas të dhënave, ngjarja dyshohet të ketë ndodhur nga janari deri në prill të këtij viti, në një pronë të dhënë me qira, por që ishte në emrin e Belina Pupës.
Në një deklaratë për mediat, Pupa tha se po pret mbylljen e procesit gjyqësor për të sqaruar çdo paqartësi, duke theksuar se bëhet fjalë për një pronë të marrë me qira nga persona të tjerë.
“Bëhet fjalë për një pronë të dhënë me qira, por që është në emrin tim. Nuk mund të flas më shumë derisa çështja të mbyllet plotësisht,” – tha Belina Pupa.
Ndërkohë, bashkëshorti i saj, aktori Elvis Pupa, reagoi ashpër ndaj lajmeve që qarkulluan në disa media, duke i cilësuar ato si manipulative dhe të pavërteta.
“Nuk jam arratisur dhe nuk jam në kërkim. Prej më shumë se një muaji ndodhem në Tiranë për angazhime profesionale. Belina është e lirë dhe po vazhdon punën e saj. Kemi besim se drejtësia do të flasë e fundit,” – u shpreh ai.
