Kryetari i Kuvendit, Niko Peleshi, ka refuzuar përfshirjen e opozitës në procesin që lidhet me mandatet e anëtarëve të Gjykatës Kushtetuese.
Kjo ka sjellë reagimin e fortë të kreut të grupit parlamentar të Partisë Demokratike, Gazment Bardhi.
Bardhi e akuzon Peleshin se ka vendosur një standard të ri, duke e trajtuar çështjen si kompetencë ekskluzive të mazhorancës, pa përfshirë opozitën.
Ai shtoi se ndryshe nga paraardhësit në krye të Kuvendit, të cilët kanë trajtuar këto çështje si pjesë e përgjegjësisë së përbashkët parlamentare, Peleshi po vepron në mënyrë të njëanshme.
Reagimi i Gazment Bardhit:
Në ndryshim nga paraardhësit në detyrën e Kryetarit të Kuvendit, që çështjet që janë në kompetencë të Kuvendit, në rastin konkret mandatet e anëtarëve të Gjykatës Kushtetuese, i kanë trajtuar si çështje të përbashkëta të të gjithë Kuvendit dhe që duhet të pasqyrojnë opinionin e të gjithë Kuvendit, Niko Peleshi vendos një standard të ri.
Për Kryetarin e Kuvendit mandatet e anëtarëve të Gjykatës Kushtetuese janë çështje e partisë–shtet, ku opozita nuk mund të ketë rol as për të thënë fjalën e saj.
Shtuar kësaj, Kryetari i Kuvendit vazhdon të firmosë “idiotësira shtetërore”, pa kuptuar se për çfarë e hedh firmën dhe aq më pak për çfarë e përdor vulën e institucionit më të lartë të shtetit – Kuvendit të Shqipërisë. Sipas tij, përfaqësimi në Gjykatën Kushtetuese bëhet vetëm në seanca publike dhe meqenëse nuk ka seancë publike, nuk mund të ketë përfaqësues.
Mandatet e Kushtetueses/ Peleshi ndryshon kursin, mohon transparencën e premtuar nga Spiropali
