Kreu i Prokurorisë së Posaçme u tërhoq të martën nga kërkesa për shkarkimin e prokurorit të Beratit, Gentian Habazaj, duke kërkuar lënien në fuqi të vendimarrjes së Komisionit të Pavarur të Kualifikimit, KPK për konfirmimin në detyrë të këtij subjekti rivlerësimi.
Gjatë paraqitjes së bisedimeve përfundimtare, prokurori Adnan Xholi, i cili përfaqëson drejtuesin e SPAK në këtë çështje, renditi konkluzionet e arritura për vetingun e Habazajt, bazuar në shqyrtimin e provave dhe shpjegimeve të dorëzuara në Kolegj.
Për vlerësimin e pasurisë, Xholi u ndal fillimisht në konstatimin e ankimit, mbi informacionin e Drejtorisë së Përgjithshme e Parandalimit të Pastrimit të Parave, DPPPP. Ai nënvizoi se edhe në përfundim të këtij shqyrtimi gjyqësor, nuk rezultuan transaksione të vetë subjektit të rivlerësimit apo personave të lidhur me të, për të cilat, organet përgjegjëse kishin ngritur dyshime.
Xholi paraqiti qëndrim të ndryshëm për shkaqet e ngritura lidhur me pamundësinë financiare në krijimin e një depozite në shumën 4.8 milionë lekë dhe kursime cash 700 mijë lekë, për burimin e të cilave subjekti deklaruar se kanë shërbyer të arhdurat e prindërve nga puna dhe aktiviteti i tyre. Ai solli në vëmendje se depozita është çelur në vitin 2003, ndërkohë që subjekti ka ndjekur Shkollën e Magjistraturës gjatë periudhës 2007- 2009 dhe është emëruar prokuror në stazh në tetor të 2009-ës, kur dhe ka depozituar në ILDKPKI deklaratën para fillimit të detyrës.
Po ashtu, Xholi konstatoi se në momentin e plotësimit dhe dorëzimit të deklaratës veting, subjekti ka qenë i shkëputur nga trungu familjar, për një periudhë prej më shumë se 6 vitesh. Duke ju referuar jurispudencës së KPA-së, Xholi tha se, në këto kushte, prindërit e subjektit nuk konsiderohen persona të lidhur e për rrjedhojë nuk mbartin të njëjtin detyrim ligjor për të justifikuar pasuritë dhe burimet e ligjshme të krijimit të tyre.
Në vijim ai konstatoi se depozita është një pasuri e krijuar herët në kohë, e provuar dhe materializuar në sistemin bankar që në vitin 2003, periudhë kur subjekti i rivlerësimit ka qenë duke ndjekur studimet universitare. Po ashtu, është konstatuar se në këtë llogari bankare janë kryer depozitime cash në vite, derisa është arritur shuma e deklaruar nga subjekti i rivlerësimit në deklaratën e parë para fillimit të detyrës. Si depozitues është identifikuar babai i ndjerë i subjektit.
Xholi tha se, si gjatë hetimit administrativ në Komision, ashtu dhe gjatë shqyrtimit të çështjes në Kolegj, u provua ekzistenca e aktivitetit të ligjshëm të babait të prokurorit Habazaj, si avokat në Vlorë, që prej vitit 1998 e deri në vitin 2015, si dhe shlyerja e detyrimeve tatimore dhe kontributeve të sigurimit të detyrueshëm shoqëror e shëndetësor si person fizik. Këto elemente vlerësohen se tregojnë se, babai i subjektit e ka ushtruar këtë aktivitet në mënyrë të ligjshme.
Po ashtu, ka rezultuar se të ardhurat e përfituara nga ky aktivitet janë deklaruar se janë përdorur si burim për financimin e depozitës që provohet se është krijuar gjatë të njëjtës periudhë.
Sipas Xholit, vitet për të cilat janë konstatuar paqartësi për të ardhurat e realizuara nga aktiviteti i të atit, i përkasin periudhës kur vetë subjekti ishte duke ndjekur studimet dhe nuk ushtronte funksione publike, duke përjashtuar tej çdo dyshimi se ka pasur mundësi të ndikojë nëpërmjet abuzimit me detyrën e tij në krijimin e pasurisë.
Në përfundim, vlerësohet se problemet e konstatuara lidhur me këtë pasuri, e krijuar para se prokurori Habazaj të merrte detyrën e prokurorit dhe jashtë ndikimit të subjektit në këtë funksion, nuk mundet ta vendosin atë në kushtet e një deklarimi të pamjaftueshëm e nuk mund të sjellin penalizim.
Për një apartament banimi në përdorim, Xholi konstatoi se kjo pasuri është blerë dhe është regjistruar 100% në pronësi të nënës së subjektit dhe se ky i fundit nuk gëzon të drejta reale mbi këtë pasuri. Ndërkohë, ka rezultuar se babai i ka lënë subjektit trashëgimi vetëm një apartament në Vlorë.
Drejtuesi i SPAK në vlerësimin e kësaj pasurie në përdorim, thotë se ka marrë në konsideratë deklarimet koherente të subjektit; blerjen e apartamentit nga prindërit përmes pagesave bankare; mungesën e të drejtave reale të prokurorit Habazaj mbi këtë pasuri; si dhe historikun e investimeve të prindërve ndër vite; duke konkluduar se nuk ngrihen dyshime.
Në përfundim të vlerësimit në kriterin e pasurisë, problemet e gjetura nuk janë vlerësuar penalizuese.
Po ashtu, është konkluduar se nuk ka probleme që mund të sjellin shkarkim as në kriterin profesional. Gjetjet në vetëm një prej procedimeve penale të hetuara nga subjekti që io janë nënshtruar rivlerësimit, janë çmuar jo penalizuese.
Në përfundim, drejtuesi i SPAK kërkoi lënien në fuqi të vendimarrjes së Komisionit, për konfirmimin në detyrë të prokurorit Gentian Habazaj.
Edhe prokurori Habazaj dhe përfaqësuesi i tij ligjor, avokati Julian Mërtiri paraqitën në mënyrë të përmbledhur bisedimet përfundimtare, duke argumentuar se ishte provuar se shkaqet e ngritura në ankim nuk qëndronin. Në përfundim, Habazaj kërkoi lënien në fuqi të konfirmimit të tij.
Kolegji u tërhoq për vendim që do të shpallet më datë 17 tetor, në orën11:00./Reporter.al
