Gjatë seancës raportuese në Komisionin e Ligjeve, kreu i Prokurorisë së Posaçme, Altin Dumani u përball me pyetje të drejtpërdrejta nga deputeti Tedi Blushi lidhur me mënyrën e ekzekutimit të masës së arrestit ndaj ish-presidentit Ilir Meta.
Dumani u shpreh se “mënyra si u ekzekutua masa e arrestit lë shumë për të dëshiruar”, duke nënvizuar se nuk është dakord me mënyrën se si u realizua.
Ai sqaroi se SPAK nuk është institucioni që ekzekuton masat e sigurisë, por kjo është kompetencë e Policisë së Shtetit, duke theksuar se kjo është një praktikë e ndërtuar ndër vite.
“Nuk ndihem përgjegjës për mënyrën e arrestimit sepse nuk e kam ekzekutuar unë masën,” tha Dumani, duke e distancuar institucionin që drejton nga mënyra e zbatimit të vendimit.
“Prokurorët e SPAK nuk marrin urdhra as nga Edi Rama dhe as nga askush. Për rastin e zotit Meta, urdhrat e ekzekutimit ia delegojmë Policisë së Shtetit. Është praktikë e ndërtuar në vite. Mënyra si është ekzekutuar masa e sigurimit lë shumë për të dëshiruar, jam kundër asaj mënyre. SPAK nuk është përgjegjës për ekzekutimin e masave të sigurisë”, tha Dumani.
