Kreu i SPAK, Altin Dumani, ka propozuar që prokurorët e këtij institucioni të kenë mundësi të rikandidojnë pas përfundimit të mandatit 9-vjeçar.
Gjatë raportimit në Komisionin e Ligjeve dhe Nismat Qytetare, Dumani tha se ligji aktual nuk e përcakton qartë statusin e prokurorëve pas mbarimit të mandatit, çka krijon pasiguri për vijimësinë e hetimeve.
“Në përfundim të mandatit tim nuk do rikandioj. Unë flas në emër të institucionit, të paktën 11 prokurorëve të posaçëm u mbaron mandati brenda 1 viti. Mund ta imagjinoni boshllëkun që krijohet. Vlerësoj se nuk kemi aq shumë burime njerëzore, se po të kishim s’do duhej gjithë ajo reformë, sa ti zëvendësojmë këta prokurorë, 11 prokurorë në një vit.
E dyta është tjetra, këta prokurorë kanë çështje që i ndjekin me vite të tëra dhe në një moment ty bukur ti i thua mandati jot mbaroi s’ke më punë me çështjen, penohen hetimet në këtë drejtim. Shteti shqiptar, BE dhe SHBA kanë investuar në këtë trupë prokurorësh për tu rritur profesionalisht për të krijuar imunitet ndaj politikës, biznesit e krimit të organizuar dhe megjithëse është bërë gjithë ky investimin, i thuhet prokurorit të posaçëm, pa paragjykuar prokurorët e përgjithshëm.
Nuk kemi luksin që një prokuror i specializuar për hetimin e një kategorie të veçantë krimesh ta çojmë në një prokurori të përgjithshme, dhe nga një krim i sofistikuar të fillojë të hetojë vjedhje të thjeshta, kanosjen, shkeljet e rregullave të qarkullimi rrugor”, tha Dumani.
Ndëkrohë në raportimin e tij ai theksoi se 33 zyrtarë të lartë janë hetuar për korrupsion. Gjithashtu vuri në dukje se korrupsioni i funksionarëve publikë ruan një nivel të lartë dhe të qëndrueshëm, duke dëshmuar zgjerimin e praktikave korruptive në administratën publike.
