Kryetarja e Komisionit të Kulturës, Turizmit dhe Diasporës, Ina Zhupa, ka reaguar ashpër pas një seance dëgjimore me drejtoreshën e Institutit të Trashëgimisë Kulturore, Joli Mitrojorgji, lidhur me asfaltimin e rrugës historike të Via Egnatia.
Sipas Zhupës, drejtuesja e IKTK-së pranoi se projekti i asfaltimit ishte miratuar nga instituti, duke e konsideruar këtë një shkelje serioze të përgjegjësive institucionale.
“Ky pranim është tronditës. Tregon papërgjegjshmëri të thellë ndaj trashëgimisë sonë kulturore. Ndërkohë që kemi kërkuar mbrojtje dhe restaurim sipas standardeve ndërkombëtare, kjo ndërhyrje deformon vlerat historike të rrugës”, tha Zhupa.
Drejtoresha e IKTK-së pranoi se projekti ishte brenda parametrave, duke shkaktuar reagime të forta për mënyrën se si po menaxhohet trashëgimia historike në vend. Zhupa e quajti ndërhyrjen një produkt të “injorancës dhe arrogancës lokale” dhe paralajmëroi se situata përbën një alarm për institucionet përgjegjëse.
