Gjyqtari Astrit Kalaja do të përcillet sot për në banesën e fundit, pas ngjarjes tragjike që i mori jetën dy ditë më parë brenda sallës së Gjykatës së Apelit në Tiranë.
Homazhet do të zhvillohen në Pallatin e Kongreseve, nga ora 09:00 deri në 11:00, ku familjarë, kolegë dhe qytetarë pritet t’i japin lamtumirën e fundit njërit prej gjyqtarëve më të njohur të sistemit shqiptar të drejtësisë.
Ngjarja ndodhi në sallën e gjyqit. Autori, Elvis Shkambi, qëlloi me armë zjarri menjëherë pas shpalljes së vendimit nga gjyqtari Kalaja, duke i marrë jetën në vend dhe plagosur dy persona të tjerë.
Si ndodhi ngjarja
Sipas të dhënave hetimore, në orën 13:42, Elvis dhe Gjon Shkambi hynë në ambientet e Gjykatës së Apelit dhe kaluan nëpër pajisjen e kontrollit, e cila sinjalizoi prezencë metalesh. Megjithatë, punonjësi i sigurisë Banush Koxha nuk ndërhyri për kontroll fizik apo regjistrim të personave në protokoll.
Rreth orës 15:29, dy vëllezërit u futën në sallën nr. 3 ku zhvillohej seanca gjyqësore. Vetëm pak minuta më vonë, në momentin që gjyqtari Kalaja shpalli vendimin, Elvis Shkambi nxori armën dhe qëlloi disa herë në drejtim të tij.
Gjyqtari u plagos rëndë dhe ndërroi jetë gjatë transportit për në spital. Ndërkohë, Rakip dhe Ervis Kurtaj, që ndodheshin në sallë, mbetën të plagosur, por ndodhen jashtë rrezikut për jetën.
Pas krimit, autori dorëzoi armën tek një punonjës gjyqësor dhe u neutralizua në oborr nga forcat e policisë.
Ngjarja ka hapur debat të gjerë për sigurinë në ambientet gjyqësore dhe neglizhencën e strukturave të rendit, që nuk arritën të parandalojnë një ngjarje të tillë të rëndë.
