Prokuroria e Apelit të Juridiksionit të Përgjithshëm ka reaguar pas ngjarjes tronditëse që i mori jetën gjyqtarit të njohur Astrit Kalaja.
Në një deklaratë publike, trupa e prokurorëve ka shprehur ngushëllimet më të sinqerta për familjen, të afërmit dhe kolegët e gjyqtarit Kalaja, duke e cilësuar atë si një figurë të respektuar të sistemit gjyqësor dhe një profesionist të palodhur në shërbim të ligjit dhe qytetarëve.
Më tej Prokuroria e Apelit e cilëson aktin si një goditje të rëndë ndaj shtetit të së drejtës.
“Dënojmë me forcë këtë akt kriminal ndaj gjyqtarit të nderuar Astrit Kalaja. Sulmi ndaj tij është një sulm i drejtëpërdrejtë ndaj shtetit të së drejtës,” thuhet në deklaratën e Prokurorisë, e cila nënvizon se çdo akt dhune ndaj magjistratëve përbën një rrezik serioz për funksionimin e drejtësisë në vend.
Prokuroria paralajmëron se kjo ngjarje duhet të shërbejë si një këmbanë alarmi për pasojat e rënda që sjell përdorimi i gjuhës së urrejtjes dhe denigrimi i figurës së magjistratit.
Sipas saj, mungesa e respektit ndaj veprimtarisë gjyqësore krijon një klimë të rrezikshme që mund të nxisë akte të dhunshme dhe të minojë besimin publik në drejtësi.
Reagimi:
“Prokuroria e Apelit të Juridiksionit të Përgjithshëm, e tronditur nga ngjarja kriminale që solli humbjen e jetës së gjyqtarit Astrit Kalaja, shpreh dhe përcjell ngushëllimet më të sinqerta për familjen, të afërmit dhe kolegët e tij.
Trupa e prokurorëve dënon me forcë këtë akt kriminal ndaj gjyqtarit të nderuar Astrit Kalaja, një figurë e respektuar e sistemit të drejtësisë dhe një profesionist i palodhur në shërbim të ligjit dhe qytetarëve, dhe njëkohësisht dënon çdo akt dhune që cënon figurën e magjistratit, sepse sulmi ndaj tij është një sulm i drejtëpërdrejtë ndaj shtetit të së drejtës.
Kjo ngjarje duhet të jetë një këmbanë alarmi për pasojat që sjell përdorimi i gjuhës së urrejtjes, denigrimit të figurës së magjistratit dhe mungesën e theksuar të respektit ndaj veprimtarisë gjyqësore.”
