Çmimi i arit po shënon nivele rekord historike, duke kaluar edhe vlerën e kriptomonedhës Bitcoin. Për herë të parë, bursa ndërkombëtare ka regjistruar një çmim prej 4,000 dollarësh për ons, që korrespondon me mbi 125 dollarë për gram.
Sipas raportimeve të Bloomberg, kjo rritje e fortë vjen si pasojë e pasigurisë gjeopolitike dhe luhatjeve në tregjet globale, të cilat po e shtyjnë kapitalin investues drejt metaleve të çmuara.
Gjatë vitit 2025, çmimet e arit janë rritur mbi 50%, ndërsa faktorë si politikat e reja tregtare të Presidentit amerikan Donald Trump dhe dyshimet mbi pavarësinë e Rezervës Federale kanë ndikuar drejtpërdrejt në rritjen e kërkesës.
Ekspertët e Goldman Sachs kanë theksuar se trendi rritës i arit mbështetet nga blerjet masive të bankave qendrore dhe investitorëve privatë, të cilët po diversifikojnë pasuritë e tyre në përpjekje për t’u mbrojtur nga inflacioni dhe pasiguria ekonomike.
Në një analizë të fundit, banka parashikon se çmimi i arit mund të arrijë 4,300 dollarë për ons deri në fund të vitit 2026, ndërsa në skenarin më optimist, ai mund të afrohet deri në 5,000 dollarë për ons, nëse vetëm 1% e tregut privat të thesarit të SHBA-së kalon në investime në ar.
Analistët theksojnë se hyrjet e fuqishme në ETF-të e mbështetura nga lingotat kanë tejkaluar çdo pritshmëri, duke sinjalizuar një interes të fortë nga investitorët me pakicë dhe duke forcuar besimin se rritja e arit mund të vazhdojë edhe gjatë vitit të ardhshëm.
