Nga Boldnews.al
Procesi i votimit të zhvilluar nga Gjykata e Lartë për anëtarin e ri të Gjykatës Kushtetuese, shoqërohet me dyshime të forta për tjetërsim të votave.
Gjykata e Lartë njoftoi paraditen e kësaj të Marte (30 shtator 2025) se mbledhja e gjyqtarëve kishte zgjedhur kolegun e tyre, Asim Vokshi, si anëtarin e ri të Gjykatës Kushtetuese.
Njoftimi zyrtar sqaron se në garë për këtë pozicion ishin tre kandidatë-Asim Vokshi, i cili mori 6 vota, Naureda Llagami, e cila arriti të sigurojë 8 vota dhe Florian Ballhysa, me zero vota, ndërkohë që një votë u shpall e pavlefshme.
Ligji parashikon që fitues shpallet kandidati që arrin të sigurojë tre të pestat e votave të të gjithë gjyqtarëve të lartë që marrin pjesë në votim. Në procedurën e kësaj të marte merrnin pjesë 15 gjyqtarë dhe kuorumi i nevojshëm ishte 9 vota.
Duke qenë se asnjëri prej tre kandidatëve nuk arriti të sigurojë kuorumin e nevojshëm, atëherë fitues u shpall automatikisht Asim Vokshi, i cili ishte renditur i pari në listën e kandidatëve të verifikuar nga Këshilli i Emërimeve në Drejtësi, një strukturë e drejtuar nga shefi i Asim Vokshit në Gjykatën e Lartë, Sokol Sadushi.
“Skandali” me votat
Procesi i përzgjedhjes së gjyqtarit të ri kushtetues, i cili do të zëvendësojë gjyqtaren me mandat të përfunduar, Holta Zaçaj, ka pasur një episod të dyshimtë, i cili mund të ndryshonte tërësisht rrjedhën e vendimmarrjes.
“Boldnews.al” mëson nga burime të brendshme se vota e shpallur e pavlefshme, në fakt tregonte qartësisht se ishte në favor të kandidates Naureda Llagami, ish-kryetare e Këshillit të Lartë Gjyqësor.
Të njëjtat burime deklarojnë për redaksinë se “vullneti në votën e shpallur të pavlefshme ishte qartësisht në favor të kandidates Llagami”. Në rast se ajo votë do të konsiderohej e rregullt, kandidatja Llagami do të arrinte në shifrën 9 të verdikteve pro saj dhe, rrjedhimisht, do të siguronte edhe kuorumin e nevojshëm për t’u zgjedhur gjyqtarja e re kushtetuese.
Asim Vokshi me “ekspertizë minimale”
Asim Vokshi u rendit i pari me pikët më të larta në listën e kandidatëve të Këshillit të Emërimeve në Drejtësi për vakancën në Gjykatën Kushtetuese. Megjithatë, në dokumentat e pikëzimit rezulton se ai ka mangësi të theksuara në disa prej kritereve që lidhen drejtëpërdrejtë me aspektin profesional.
Në procesin e pikëzimit, Asim Vokshi rezulton se ka marrë 62 nga 108 pikë në total në kriterin e “Ekspertizës në fushat e së drejtës”. Për këtë kriter, secili nga 9 anëtarët e Këshillit të Emërimeve në Drejtësi mund të bëjë një vlerësim maksimalisht me 12 pikë, sipas Metodologjisë për Vlerësimin dhe Caktimin e Pikëve për kandidatët për në Gjykatën Kushtetuese.
Sipas dokumentave të konsultuar nga “Boldnews.al”, kandidati Asim Vokshi është vlerësuar për këtë kriter nga 4 deri në 8 pikë, një rezultat dukshëm shumë larg nga ajo që pritet nga një gjyqtar kushtetues.
“Cilësia”, e ulët
Kandidati fitues për në Gjykatën Kushtetuese, Asim Vokshi, është vlerësuar dobët edhe në kriterin e cilësisë, një tjetër indikator shumë i nevojshëm për një profil të lartë gjyqtari.
Në mbledhjen e datës 23 Shtator 2025, anëtarët e Këshillit të Emërimeve në Drejtësi vendosën të vlerësonin kandidatin Vokshi me një total prej 198 pikësh në “vlerësimin cilësor”, ndërkohë që maksimumi për këtë kriter ishte 270 pikë.
Sipas dokumentit të pikëzimit, Asim Vokshi është vlerësuar për cilësinë përgjithësisht me 23-24 pikë, ndërkohë që njëri prej anëtarëve i ka dhënë pikë minimale, vetëm 16 të tilla. Për këtë kriter, anëtarët e Këshillit të Emërimeve në Drejtësi mund të votonin maksimalisht me 30 pikë. Dukshëm, kandidati dhe tashmë gjyqtari i ri kushtetues, Asim Vokshi, është vlerësuar shumë larg maksimumit.
Injorim nga kolegët
Këshilli i Emërimeve në Drejtësi (KED) e kanë vlerësuar pozitivisht kandidatin Asim Vokshi për kriteret e “punës në grup”, “aftësitë e komunikimit” dhe “reputacionit”. Megjithatë, këto kritere duket se janë pikëzuar “fiktivisht” nga 9 anëtarët e KED-it.
Në këtë mënyrë mund të lexohet votimi që u zhvillua në Gjykatën e Lartë për gjyqtarin e ri kushtetues.
Asim Vokshi, i cili është prej katër vitesh anëtar i Gjykatës së Lartë, arriti të marrë votat e vetëm 6 kolegëve të tij, nga një total prej 15 pjesëmarrësish.
Ky rezultat i dobët është një tregues domethënës se ai nuk ka arritur të krijojë “punë në grup” apo edhe “reputacion” të mirë mes kolegësh, megjithëse për këto dy aspekte është vlerësuar pozitivisht në Këshillin e Emërimeve në Drejtësi.
Kandidatja humbëse
Emërimi i Asim Vokshit në Gjykatën Kushtetuese është paralajmëruar më herët nga “Boldnews.al” dhe vjen si vijim i një “lobimi” të fortë në favor të tij nga kreu i Gjykatës së Lartë dhe njëkohësisht, kryetar i Këshillit të Emërimeve në Drejtësi, Sokol Sadushi.
Megjithatë, votimi në Gjykatën e Lartë tregoi se edhe kandidatja “humbëse”, Naureda Llagami, duket se ka pasur një lobim shumë të fortë.
Ish-kryetare e Këshillit të Lartë Gjyqësor, Llagami ka qenë personi përgjegjës për emërimin e anëtarëve aktualë të Gjykatës së Lartë. Po ashtu, Llagami ka “luftuar” prej kohësh për të marrë një post të tillë, sipas disa mesazheve telefonike që u publikuan më herët dhe që thuhet se i përkisnin kohës kur ajo ishte ende në krye të KLGJ-së.
Sipas bisedave telefonike, të cilat gjithësesi u mohuan nga Llagami, ajo diskutonte me Klotilda Bushkën, ish-kryetare e Komisionit të Ligjeve në atë kohë, për të siguruar një vend në Gjykatën Kushtetuese. Bisedat me këtë kontekst, sipas denoncuesit anonim të atyre mesazheve, janë detajuar më tej në zyrën ligjore të Ajola Xoxes, bashkëshortja e kryetarit të arrestuar të Bashkisë së Tiranës, Erion Veliaj.
