Janë zbardhur detaje të reja nga vrasja e biznesmenit italian, 44-vjeçar Edoardo Sarchi, në rrethana ende të paqarta. Ai u gjet pa shenja jete, rreth orës 00:30 në anë të rrugës në vendin e quajtur Dilan mes Nivicës dhe Salarisë, në Tepelenë.
Në trupin e viktimës, në pjesën e këmbës është konstatuar një plagë plumbi, në arterien kryesore, ku gjakderdhja dyshohet se i ka shkaktuar vdekjen.
Por, burime pranë grupit hetimor bëjnë me dije se 44-vjeçari, nga ekspertiza mjeko-ligjore, nuk është vrarë menjëherë me armë zjarri, siç dyshohej fillimisht.
Dyshohet se se para se të qëllohej me armë zjarri në këmbë, viktima është goditur me një mjet të fortë, dyshohet dru ose shufër, në pjesën e kokës. Goditja i ka shkaktuar humbje të menjëhershme të ndjenjave, duke e lënë pa ndihmë në tokë.
Pasi ka humbur ndjenjat, autori (apo autorët) e kanë qëlluar më pas me armë zjarri në këmbë. Edhe pse plumbi nuk ishte i menjëhershëm për jetën, gjakderdhja e madhe ka rezultuar fatale, duke i shkaktuar vdekjen viktimës disa minuta më vonë.
Burime bëjnë me dije se një nga pistat kryesore ku po heton Policia lidhet me një konflikt të mundshëm pronësor apo financiar, për të cilin italianit mund t’i jetë bërë pritë.
Kujtojm se Edoardo Sarchi ndodhej për gjueti së bashku me Eqerem Braçe dhe dy djemtë e tij, Daniel dhe Gazmend Braçe, si dhe me një person të katërt. Në vendin e ngjarjes uniformat blu gjetën dy automjete, ku një prej tyre ishte e viktimës.
Burime bëjnë me dije se Daniel, Gazmend dhe Eqerem Braçe janë marrë 4 herë në pyetje, fillimisht nga Oficerët e Policisë Gjyqësore, Prokuroria, Specialistët e Krimeve të Rënda e në fund përsëri nga OPGJ. Kjo marrje në pyetje është bërë për shkak se të tre këta persona kanë dhënë dëshmi kontradiktore me njëri-tjetrin.
Fillimisht këta persona kanë thënë se e kanë gjetur italianin Edoardo Sarchi të vdekur në anë të rrugës, e më pas kanë thënë se e kanë gjetur të plagosur dhe u vdiq në duar, ndërsa versioni i tjetër është se ka qenë së bashku për gjah dhe se dikush u kishte prerë rrugës dhe u ka qëlluar me armë zjarri.
Burime bëjnë me dije se grupi hetimor ende nuk e ka përcaktuar vendin e saktë se ku ka ndodhur krimi, pasi ka dyshime se italiani mund të jetë vrarë në vend tjetër dhe të jetë sjellë më pas tek vendi ku u gjet.
Edoardo Sarchi zhvillon aktivitet tregtar në Shqipëri prej të paktën 25 vitesh. Ai rezulton administrator dhe një prej pronarëve të shoqërisë “Tegola Edilcentro”, me seli në Laprakë të Tiranës dhe me aktivitet prodhim tullash, etj. Ai dyshohet se e frekuentonte vazhdimisht zonën e Salarisë në Tepelenë për gjueti.
Ky është biznesmeni italian që u vra në rrethana misterioze në Tepelenë
