Pasi janë mbajtur përgjatë gjithë ditës së sotme në ambjentet e Policisë së Gjirokastrës, duke u marrë në pyetje si persona në dijeni, aktualisht dy vëllezërit Danjel dhe Gazmend Braçi si dhe babai i tyre, Eqerem Braçi, janë lënë të lirë nga Policia.
Lajmi për lirimin e tre anëtarëve të familjes Braçi është konfirmuar nga burimet për mediat, ku tre personat e dyshuar nga policia tashmë janë liruar pasi ndaj tyre deri në këtë fazë të hetimit nuk janë gjendur prova për implikim në krim.
Biznesmeni italian, 44-vjeçari Edoardo Sarchi u gjet pa shenja jete, rreth orës 00:30, të mesnatës së kaluar, në anë të rrugës në vendin e quajtur Dilan mes Nivicës dhe Salarisë, në Tepelenë.
Në trupin e viktimës, është konstatuar vetëm një plagë plumbi, në pjesën e këmbës, në arterien kryesore, ku gjakderdhja dyshohet se i ka shkaktuar vdekjen.
Ai ndodhej për gjueti së bashku me Eqerem Braçin dhe dy djemtë e tij, Daniel dhe Gazmend Braçi, si dhe me një person të katërt. Në vendin e ngjarjes uniformat blu gjetën dy automjete, ku një prej tyre ishte e viktimës.
Sipas raportimeve mediatike, Daniel, Gazmend dhe Eqerem Braçi janë marrë 4 herë në pyetje, fillimisht nga Oficerët e Policisë Gjyqësore, Prokuroria, Specialistët e Krimeve të Rënda e në fund përsëri nga OPGJ. Kjo marrje në pyetje është bërë për shkak se të tre këta persona kanë dhënë dëshmi kontradiktore me njëri-tjetrin.
Fillimisht këta persona kanë thënë se e kanë gjetur italianin Edoardo Sarchi të vdekur në anë të rrugës, e më pas kanë thënë se e kanë gjetur të plagosur dhe u vdiq në duar, ndërsa versioni i tjetër është se ka qenë së bashku për gjah dhe se dikush u kishte prerë rrugës dhe u ka qëlluar me armë zjarri.
Edoardo Sarchi zhvillon aktivitet tregtar në Shqipëri prej të paktën 25 vitesh. Ai rezulton administrator dhe një prej pronarëve të shoqërisë “Tegola Edilcentro”, me seli në Laprakë të Tiranës dhe me aktivitet prodhim tullash, etj. Ai dyshohet se e frekuentonte vazhdimisht zonën e Salarisë në Tepelenë për gjueti.
