Policia e Durrësit ka goditur një rast të ushtrimit të prostitucionit, në kuadër të operacionit të koduar “Space”. Si rezultat i hetimeve, është arrestuar organizatori i dyshuar, shtetasi turk I. Y., 37 vjeç, i cili dyshohet se ka rekrutuar 3 shtetase kineze për të ushtruar prostitucion në një apartament të marrë me qira në lagjen nr. 13, Durrës.
Gjatë kontrollit, policia ka sekuestruar 3 celularë të tij.
Gjatë fazës së parë të këtij operacionit, Seksioni për Hetimin e Trafiqeve arrestoi 3 shtetase kineze dhe referoi materialet në Prokurori, për 5 shtetas.
”Si rezultat i hetimeve të kryera në kuadër të këtij operacioni, me qëllim nxjerrjen përpara përgjegjësisë penale të të gjithë shtetasve të implikuar në një rast të përshtatjes së apartamenteve, për ushtrim të prostitucionit, strukturat hetimore të Drejtorisë Vendore të Policisë Durrës, në drejtimin e Prokurorisë, identifikuan organizatorin e dyshuar të kësaj veprimtarie kriminale, shtetasin turk I. Y., 37 vjeç, i cili u kap nga shërbimet e Komisariatit të Policisë Nr. 2, Tiranë.
Nga hetimet e deritanishme dyshohet se ky shtetas ka rekrutuar 3 shtetaset kineze (të arrestuara gjatë operacionit “Space”), për të ushtruar prostitucion në një apartament të marrë me qira në lagjen nr. 13, Durrës. Sekuestrohen 3 celularët e këtij shtetasi”, njofton policia.
Materialet procedurale iu referuan Prokurorisë së Durrësit, për veprime të mëtejshme.
