Banorët e zonës së Kurdarisë, së bashku me përfaqësues të Partisë “Lëvizja Shqipëria Bëhet”, përfshirë nënkryetaren Dorina Prethi dhe kreun Adriatik Lapaj, kanë nisur sot pranë Gjykatës Administrative të Shkallës së Parë Tiranë gjyqin për ndalimin e ndërtimit të hidrocentralit privat “DOMA”.
Prethi tha se leja e ndërtimit është dhënë pa respektuar procedurat ligjore, duke anashkaluar dëgjesat publike dhe rregullat për përdorimin e fondit pyjor sipas ligjit 139 “Për vetqeverisjen vendore”.
“Jam pjesë e kësaj kauze me gjithë vendosmërinë tone, për ta mbështetur jo vetëm si e angazhuar me Shqipëria Bëhet, si e angazhuar në politikë, por absolutisht si një çështje kombëtare.
Zona e Kurdarisë është hambari i rrethit të Matit dhe këta banorë faktikisht janë 700 familje që kanë firmosur një peticion të mëparshëm. Numri i banorëve të kësaj zone është shumë i madh dhe kjo zonë është jashtëzakonisht e rëndësishme për zhvillim, jo vetëm për ujë të pijshëm, por për vaditje, për bujqësinë, për blegtorinë. Është jeta e këtyre banorëve. U hoqe ujin, ata zërë se i ke vrarë dhe absolutisht, jam jashtëzakonisht e kënaqur që qëndrueshmëria e tyre është shumë e madhe dhe jam e bindur që do vazhdojë deri në fund.”, tha Dorina Prethi.
Zona e Kurdarisë përfshin rreth 700 familje dhe ka rëndësi për ujë të pijshëm, vaditje, bujqësi dhe blegtorinë. Banorët kanë firmosur një peticion më herët kundër projektit dhe shprehen të vendosur për të mbrojtur të drejtat e tyre dhe natyrën.
