Një aksident me pasojë vdekjen ka ndodhur sot në Qungur të Pejës.
Telegrafi raporton se viktima e aksidentit tragjik është Eldion Kelmendi,vëllai i reperit të njohur Besart Kelmendi – Gjesti, njëherësh fitues i edicionit të katërt të Big Brother VIP Albania.
Aksidenti ndodhi rreth orës 14:00, kur një makinë u përplas me një katërçikletë, duke lënë një person të vdekur dhe një tjetër të lënduar rëndë. I lënduari, me inicialet K.B, ndodhet në gjendje të rëndë shëndetësore dhe është duke u operuar në spitalin e Pejës.
Zëdhënësi për rajonin e Pejës, Fadil Gashi, kishte konfirmuar më herët aksidentin, duke thënë: “Rreth orës 14:00, në fshatin Qungur të komunës së Pejës ka ndodhur një aksident mes një veture dhe një katërçiklete. Policia ka dalë menjëherë në vendngjarje, ndërsa ekipi mjekësor ka konfirmuar vdekjen e një personi në vendin e ngjarjes dhe lëndimin e rëndë të një tjetër, i cili është dërguar me urgjencë në QKUK”.
Ngjarja ka shkaktuar tronditje në komunitet dhe te fansat e reperit Gjesti, ndërsa hetimet për shkaqet e aksidentit vazhdojnë.
Telegrafi ka provuar edhe me Policinë ta konfirmojë një informatë të tillë por deri në publikimin e këtij artikulli, nuk ka një informatë zyrtare.
