Kryeministri izraelit, Benjamin Netanyahu, u zotua të enjten se do të denoncojë udhëheqësit e vendeve perëndimore që kanë njohur një shtet të pavarur palestinez, gjatë fjalimit të tij në Asamblenë e Përgjithshme të Kombeve të Bashkuara në New York.
“Në Asamblenë e Përgjithshme të OKB-së do të flas të vërtetën për qytetarët e Izraelit, për ushtarët tanë dhe për vendin tonë,” tha Netanyahu në mëngjes në pistën e Aeroportit Ben Gurion.
Ai shtoi se do të denoncojë udhëheqësit që, sipas tij, në vend që të ndëshkojnë kriminelët dhe dhunuesit, synojnë t’u japin atyre një shtet në zemër të Izraelit. “Kjo nuk do të ndodhë,” u shpreh Netanyahu.
Çështja e njohjes së një shteti palestinez nga vende si Mbretëria e Bashkuar, Franca, Kanadaja dhe Portugalia pritet të dominojë takimet e Netanyahut me udhëheqës të tjerë në margjinat e Asamblesë së OKB-së, përfshirë edhe takimin me Presidentin amerikan Donald Trump në Uashington të hënën.
