Kreu i Partisë Demokratike, Sali Berisha, deklaroi jashtë Kuvendit se ministrja e Infrastrukturës, Belinda Balluku – të cilën e quajti “Lubi Balluku” – “nuk do të dalë ndonjëherë nga tuneli i Llogarasë”.
Berisha e përshkroi tunelin si “monumentin më të shëmtuar të vjedhjes” dhe shtoi: “Drejtësia vonon, por nuk harron”. Ai tha gjithashtu se mazhoranca e ka shumë të qartë se “i pret fundi i Erion Veliajt”.
Kryedemokrati kritikoi parlamentin dhe mazhorancën socialiste, duke e cilësuar seanca e fundit si pjesë e një akti “anti-kushtetues” dhe të “narkoparlamentit”. Ai u bëri thirrje qytetarëve të tregojnë vendosmëri dhe të protestojnë kundër atyre që, sipas tij, kanë uzurpuar pushtetet dhe nuk respektojnë ligjin, Kushtetutën apo moralin.
Sali Berisha: Siç e patë vetë, narkoparlamenti i Partisë Socialiste, vazhdoi edhe sot konsolidimin e aktit më antikushtetues në historinë e këtij parlamenti, votimin në errësirë të plotë të narkoqeverisë dhe programit të saj.
Qytetarët e panë se çdo gjë ëshët e pashpresë në rrugë procedurale dhe ligjore dhe rruga e vetme mbetet vendosmëria qytetare, protesta kundër këtij grupi mafioz që ka uzurpuar të gjitha pushtetet dhe nuk njeh ligj, Kushtetutë dhe as moral.
Sot ishte një mundësi që të anullohej seanca dhe me anullimin e seancës rivendosej Kushtetuta.
