Një e dënuar me probleme të rënda shëndetësore ka ndërruar jetë në orët e para të mëngjesit të sotëm në Qendrën Spitalore Universitare “Nënë Tereza”.
E ndjera është identifikuar si Afërdita Leke Hajdarkola, 33 vjeçe, e lindur në Tropojë dhe banuese në Tiranë. Ajo ishte arrestuar për veprën penale të dhunës në familje dhe vuante dënimin në Institutin e Ekzekutimit të Vendimeve Penale “Ali Demi”, që prej 20 prillit 2020.
Më 15 tetor të po atij viti, për shkak të gjendjes së rënduar shëndetësore, ajo u transferua në Qendrën Spitalore të Burgjeve, pasi vuante nga insuficienca renale kronike, dhe trajtohej me dializë të rregullt.
Mbrëmjen e djeshme, gjendja e saj u përkeqësua ndjeshëm dhe u shtrua në Reanimacionin Qendror të QSUT-së, ku u diagnostikua me acidozë metabolike dhe hipotension të rënduar. Pavarësisht përpjekjeve të stafit mjekësor, rreth orës 03:40 të mëngjesit, 33-vjeçarja ndërroi jetë si pasojë e një arrestit kardiopulmonar.
