Ish-ministri dhe ish-deputeti demokrat, Genc Pollo, ka reaguar në Facebook për votimin e sotëm në Këshillin Bashkiak mbi kërkesën e kryeministrit Rama për shkarkimin e Erion Veliajt.
Pollo kujtoi se një kërkesë e ngjashme ishte dorëzuar nga këshilltarët opozitarë në maj 2025, por ishte injoruar nga mazhoranca, duke penguar futjen e saj në rendin e ditës.
Sipas tij, tani që kushtet për shkarkimin e Veliajt janë plotësuar, opozita duhet të zgjedhë midis dy opsioneve: të votojë duke treguar koherencë, edhe pse mazhoranca ka votat e mjaftueshme, ose të debatojë dhe të abstenojë, duke refuzuar të mbështesë një proces që e sheh si anti-demokratik.
Postimi i plotë
Sot Këshilli Bashkiak voton kërkesën e Ramës për shkarkimin e Veliajt.
Një kërkesë idem e paraqitën këshilltarët e opozitës në maj 2025 kur u përmbush tremujori i mungesës së kryebashkiakut siç e parashikon ligji. Mazhoranca e injoroi kërkesën e majit duke penguar futjen në rend-dite të mbledhjes së Këshillit.
Tashti që në PS u poqën kushtet për shkarkimin e Veliajt pyetja është çfarë lipset të bëjnë këshilltarët opozitarë. Të votojnë kërkesën e Ramës duke treguar koherencë edhe kur mazhoranca i ka votat e mjaftueshëm? Duke harruar refuzimin jo-demokratik të kërkesës së majit? Si dhe duke hartuar bunkerizimin antidemokratik të Këshillit nga Veliaj e PS sidomos këtë vit?
Apo të debatojnë siç kanë bërë tërë kohën kundra krimeve dhe abuzimeve të Veliajt (që pjesërisht u aprovuan nga këshilltarët PS) e në momentin e votimit të abstenojnë ose të largohen nga salla?
Në kushte normale mund të votonin për shkarkimin.
Në kushtet anti demokratike të bashkisë Tiranë (e më gjerë) do të këshilloja opsionin e dytë.
