Errol Musk, babai 79-vjeçar i miliarderit Elon Musk, akuzohet për abuzim seksual ndaj pesë prej fëmijëve të tij që nga viti 1993. Kështu raportoi News York Times këtë të martë.
Sipas medias amerikane, këto akuza mund të jenë arsyeja pse Elon Musk i cili shërbeu përkohësisht si këshilltar në administratën e dytë të Trump-it, rrallë e përmend babanë e tij. Sipas familjarëve që i janë drejtuar për ndihmë, ai herë pas here ndërhyn.
Errol Musk i hodhi poshtë menjëherë akuzat, duke thënë për gazetën se ato janë “të rreme”. Kur u kontaktua nga The Guardian, Errol Musk u përgjigj ndaj pyetjeve me fraza si “kjo është budallallëk” dhe “kjo është komplet pa kuptim”.
Duke iu referuar letrave personale, emaileve dhe intervistave me anëtarë të familjes, NYT thotë se Errol Musk, i cili ka të paktën nëntë fëmijë dhe ka qenë i martuar tri herë, “ruan një ndikim të madh mbi pjesën më të madhe të familjes”.
Sipas dokumenteve gjyqësore, korrespondencave personale, punonjësve socialë dhe intervistave të familjarëve, akuza e parë ndaj Errol Musk daton në vitin 1993, kur thjeshtra e tij e vogël në moshën katër vjeç u tha të afërmve se ai e kishte prekur në shtëpinë e familjes.
Dhjetë vite më vonë, ajo vajzë pretendoi se e kishte kapur atë duke i nuhatur rrobat e papastra, dhe disa prej familjarëve po ashtu e akuzojnë për abuzim ndaj dy prej vajzave të tij dhe një djalë me baba tjetër.
Janë hapur tre hetime të ndryshme ligjore sipas policisë dhe dokumenteve gjyqësore si dhe rrëfimeve të familjarëve. Dy prej hetimeve përfunduan pa ndonjë veprim, ndërsa nuk dihet çfarë ka ndodhur me hetimin e tretë.
“nuk ka prova sepse kjo është budallallëk,” tha Errol Musk në një deklaratë për NYT, duke thënë “raportet janë të rreme”. Ai akuzoi anëtarët e familjes se “po nxisin fëmijët të thonë gjëra të rreme” dhe se po përpiqeshin të shantazhonin Elonin, djalin e tij të madh.
Elon Musk e ka përshkruar gjithmonë si të vështirë marrëdhënien me babanë e tij në rastet kur e ka komentuar atë. Në një intervistë për Rolling Stone në vitin 2017 ai tha se babai i tij kishte bërë “pothuajse çdo gjë të keqe që mund të mendoni”.
Në profilin e tij, Musk tha se ishte kujdesur për babanë e tij që në moshë 10-vjeçare, duke jetuar me të teksa motrat dhe vëllai që ishin më të vegjël qëndronin me nënën.
