Deputeti i Partisë Demokratike, Xhelal Mziu, në një konferencë për shtyp së bashku me Sali Berishën, reagoi për herë të parë pas shpërthimit me tritol që ndodhi gjatë natës pranë banesës së tij në Kodër Kamëz.
Mziu tha se ngjarja ka prapavijë politike dhe nuk lidhet me konflikte personale apo borxhe. Ai shtoi se sulme të tilla nuk do ta ndalin opozitën, përkundrazi janë dëshmi e frikës që ka qeveria ndaj zërit të lirë.
“Mbrëmë, rreth orës 00:55, pranë shtëpisë sime pati një shpërthim që fatmirësisht nuk solli dëme në njerëz. Pati dëme materiale, por jam i gëzuar që nuk pati pasoja për familjen time dhe as për kalimtarët. Nuk kam asnjë konflikt me askënd dhe asnjë borxh. E konsideroj një akt absolutisht politik, një sinjal për të treguar se nuk mund të reagosh ndaj kësaj qeverie krimi e korrupsioni. Përveçse një hakmarrje politike, nuk e konsideroj ndryshe,” tha deputeti i PD-së.
