Në prezantimin e ministres së re të Punëve të Brendshme, Albana Koçiu, kryeministri Edi Rama foli për “revolucionin digjital” dhe rritjen e sigurisë nëpërmjet mbulimit me kamera të të gjithë territorit. Por ndërkohë, realiteti në terren duket të jetë shumë larg këtyre premtimeve.
Rama u shpreh se një burrë 90 vjeç përfundoi në gjykatë për ndërtim pa leje matanë Dajtit, ndërsa në mes të Tiranës ka ndërtime 4-5 katëshe pa leje që nuk i ka parë njeri. “Shteti është më i madh se ty dhe ti nuk e gëzon dot,” tha Rama, duke u munduar të dërgojë mesazh tek ndërtuesit.
Rama: Vetëm në këtë periudhë, është dhënë mesazhi që sado të madh ta kesh emrin në botën e ndërtimin dhe pallatin me shkelje, shteti është më i madh se ty dhe ti nuk e gëzon dot. Sepse deri dje, i shikonin vetëm avllitë, një burrë 90 vjeç përfundoi në gjykatë si ndërtues pa leje për një riparim matanë Dajtit. Sesi e gjeti policia këtë kriminel në një vrimë matanë Dajtit, do ishte për medalje ari nëse do të kishte mbetur vetëm ajo e atij. Ndërkohë në mes të Tiranës, 4-5 kate pa leje të cilat do t’i gëzojë shteti e jo ai që i ka ndërtuar.
Transformimi teknologjik, një tjetër problem i madh. Na janë dashur muaj të tërë për të konkluduar në këtë sistem këtu, marrëveshjen më të rëndësishme për sigurinë me Emiratet e Bashkuara që tani më në fund u konkludua dhe që do të na japë mundësinë të kemi qytete inteligjente, mbulim me kamera inteligjente tërësisht nga rrugët, tek shkollat, brenda shkollës e klasës, për të na dhënë nivel sigurie të një standardi të lartë amerikan.
Hajde gjeje me juristët e punëve të brendshme dhe me ato të policisë sepse kjo administratë dhe ajo atje te Lana e ministrisë së Jashtme, kanë një tarbiat të vjetër, “lëre siç është se është më mirë. Mos i hy farë se më mirë nuk ka.”
Prandaj për t’a adresuar të gjithë domosdoshmërinë dhe ngritjen në një nivel tjetër, ministrja sjell me vete një eksperiencë të gjatë në administratë duke nisur që nga niveli i parë. Ministrja do udhëheqë përshkallëzimin e revolucionit digjital dhe futjen e inteligjencës artificiale dhe në këtë ministri në mënyrë që të rrisim parametrat e sigurisë në tërësi.
