Emisioni “Top Story” ka publikuar mbrëmjen e sotme për herë të parë pamjet e vrasjes së 34-vjeçarit Kristian Kola. Ngjarja ndodhi rreth orës 22:30, në një lokal tek kinema “Republika”, në lagjen “Vasil Shanto”, më 4 shtator.
Në atë atentat ishin dy persona me motor, njëri në rolin e qitësit dhe tjetri në rolin e drejtuesit, teksa motomjeti u gjet pas dy ditësh i djegur në fshatin Vakatanë.
Në pamjet e siguruara nga gazetari Eraldo Harlicaj, duken teksa dy autorët afrohen pranë hotelit ku ndodhej shënjestra dhe qëllojnë me armë drejt tij. Madje njëri prej tyre kthehet për të verifikuar nëse e ka vrarë Kolën, dhe largohen me shpejtësi pa lënë asnjë gjurmë.
Gjatë momentit të ekzekutimit, dy zonja shihen teksa largohen të tmerruara, ndërsa aty pranë ndodhej edhe një autobus që sapo kishte zbritur disa turistë.
Ky atentat mbetet ende i pazbardhur, teksa burime për mediat bëjnë me dije se grupi hetimor dyshon se autori mund të ketë qenë Ragip Gila, pasi nga analizat e kamerave dhe hetimet, autori ka tipare fizike të ngjashme dhe përdor një mënyrë të ngjashme ekzekutimi, edhe në atentatin e regjistruar 5 ditë më pas.
Kristian Kola rezultonte një person pa precedent penal, teksa ai kishte një firmë ndërtimi së bashku me babain.
*Pamjet e atenatit mund ta shihni nga minuta 01:30
