Kostoja e nevojshme për çdo vit të luftës në Ukrainë arrin në 120 miliardë dollarë, sipas asaj që deklaroi Volodymyr Zelensky gjatë një takimi me Kryetaren e Parlamentit Europian, Roberta Metsola.
“Kostoja e kësaj lufte sot dhe sfidat që përballemi arrijnë në 120 miliardë për një vit. Nga këto, 60 miliardë mbulohen nga buxheti i Ukrainës. Për vitin e ardhshëm, duhet të sigurojmë edhe 60 të tjerë,” tha presidenti ukrainas, duke shtuar megjithatë se shpresa e tij është që konfliktet të përfundojnë brenda këtij viti.
“Shpresoj që ta mbyllim këtë luftë. ‘Plani A’ është ndalimi i luftimeve, ndërsa ‘plani B’ janë 120 miliardë dollarë. Kjo është e gjithë historia. Është një problem shumë i madh. Nuk them që në kohë paqeje, gjatë një armëpushimi ose në kuadër të garancive të sigurisë do të na duhen shuma kaq të mëdha. Por në çdo rast, duhet të kuptoni shkallën e këtij problemi,” theksoi Zelenski.
Donald Trump i bëri thirrje Zelenskit dje që të arrijë një marrëveshje për të përfunduar luftën në Ukrainë, duke shtuar se edhe ai vetë duhet të jetë në të njëjtën dhomë me negociatorët e Moskës dhe Kievit.
“Zelenski duhet të bëjë marrëveshje,” tha presidenti amerikan për gazetarët në Shtëpinë e Bardhë para nisjes për Britaninë, duke shtuar se gjatë bisedimeve të ardhshme të paqes midis Rusisë dhe Ukrainës, ai ndoshta duhet të jetë në të njëjtin ambient me dy delegacionet, pasi palët “nuk mund të qëndrojnë bashkë”.
“Mendoj se do të duhet të qëndroj në një dhomë me ta, sepse ata nuk mund të qëndrojnë bashkë në të njëjtën,” tha Trump, ndërsa përsëriti thirrjen për Europën që të ndalojë blerjen e naftës ruse.
Ndërkohë, Shtetet e Bashkuara kanë aprovuar paketat e para të ndihmës ushtarake për Ukrainën, brenda një mekanizmi të ri financimi nga aleatët, njoftoi sot zëdhënësi i Ministrisë së Jashtme të Ukrainës, Heorhii Tykhyi.
Zv/ministri amerikan i Mbrojtjes, Elbridge Colby, ka miratuar deri në dy dërgesa me vlerë nga 500 milionë dollarë secila, në kuadër të këtij mekanizmi të quajtur Lista e Kërkesave Prioritare për Ukrainën (PURL), sipas burimeve.
