Deputeti i Partisë Demokratike, Tritan Shehu, ka shprehur sot shqetësimin e tij për projektligjin e ri mbi Barazinë Gjinore, që parashikon njohjen e më shumë se dy gjinive në Shqipëri.
Në një intervistë në News 24, Shehu e ka cilësuar këtë iniciativë si një tentativë për të degradojë shoqërinë dhe për të shkatërruar familjen tradicionale, duke vënë theksin tek rëndësia e ekzistencës së jetës vetëm përmes burrit dhe gruas.
“Ky projektligj është dorëzuar para hapjes së sesionit dhe është maskuar me titullin për barazi gjinore, por në të vërtetë nuk ka asnjë lidhje me barazinë. Ai synon shkatërrimin e koncepteve të vërteta të shoqërisë, familjes dhe gjinive,” u shpreh Shehu.
Ai akuzoi se prapaskenat e këtij projektligji qëndrojnë te grupet LGBT, të cilat sipas tij “duan të degradojnë shoqërinë njerëzore dhe të krijojnë ndarje artificiale mbi bazën e gjinive.”
Deputeti theksoi se shoqëria dhe jeta ekzistojnë vetëm përmes burrit dhe gruas dhe se çdo ndryshim që tenton të njohë më shumë se dy gjini është një rrezik për stabilitetin shoqëror:
“Në Shqipëri duhet të njihen vetëm dy gjini, mashkulli dhe femra, të cilët përbëjnë themelin e jetës. Nëse pranojmë më shumë se dy gjini, vihet në rrezik mbarë shoqëria”, u shpreh demokrati.
Shehu e përshkroi projektligjin si pjesë të një agjende të majtë populiste që synon të ndryshojë rrënjësisht vlerat tradicionale të shoqërisë shqiptare.
