Policia e Shtetit ka reaguar vetëm pas publikimit të pamjeve në media, në lidhje me sherrin e regjistruar sot në zonën e Freskut, në Tiranë, ku një konflikt për motive pronësie ka përfunduar me dhunë fizike dhe kërcënime.
Sipas njoftimit, Sindi Allushi, djali i kryetarit të njësisë administrative nr. 12, Saimir Allushi, në bashkëpunim me kushëririn e tij, P. A., 33 vjeç kanë dhunuar me grushte shtetasin D. K.
Pas episodit të dhunës, dyshohet se një tjetër i afërm i tyre, e ka kanosur shtetasin D. K. nëpërmjet telefonit.
Ndërkohë pas ngjarjes mësohet se Sindi Allushi është larguar me automjet nga vendi i ngjarjes ndërkohë që policia është duke punuar për kapjen e tij.
Ngjarja ka sjellë edhe pasoja disiplinore brenda strukturave të policisë. Drejtori i Policisë së Tiranës ka urdhëruar pezullimin nga detyra të punonjësit të policisë, P. M., i cili akuzohet për “shkelje të rëndë për mosveprim” në menaxhimin e rastit.
