Gazetari Basir Çollaku, i ftuar në emisionin “Task Force” në Syri TV, akuzoi kryeministrin Edi Rama për shantazh sistematik ndaj gjyqtarëve dhe prokurorëve, duke thënë se vetëm gjatë një muaji janë regjistruar gjashtë raste presioni të drejtpërdrejtë.
“Përpjekja shantazhuese ndaj gjyqtarit të radhës është e gjashta brenda një muaji. Po u thotë: mos guxoni të merrni vendime që nuk më pëlqejnë. KLP e KLGJ nuk flasin,” tha Çollaku.
Ai akuzoi gjithashtu institucionet e drejtësisë për keqpërdorim të fondeve të dhëna nga SHBA dhe BE për reformën në drejtësi:
“Nuk janë vetëm 270 milionë dollarë të amerikanëve, por edhe 600-700 milionë euro të BE-së. Janë 1 miliardë euro që mund të jenë bërë pallate me paratë e drejtësisë. KLP e KLGJ janë për t’u hetuar.”
Çollaku përmendi emra konkretë nga sistemi, duke thënë se asnjë dosje ndaj ministrave dhe ish-zyrtarëve të lartë nuk mund të mbyllet pa u pyetur Rama, përfshirë edhe çështjen e McGonigal, që sipas tij ka mbetur pezull.
Gazetari akuzoi Ramën dhe presidentin serb Vuçiç për lidhje të drejtpërdrejta me kartelet e drogës në Amerikën Latine:
“Kartelet shqiptare të lidhura me ato serbe në Amerikën e Jugut janë grupe të përbashkëta që kanë lidhje organike me Vuçiç dhe Ramën. Paligjshmëria dhe krimi i organizuar janë mbërthyer bashkë. Rama është anëtar i këtij bordi dhe duhet të hetohet si i pandehur.”
Çollaku theksoi se miliarda euro të kokainës janë pastruar në Shqipëri përmes sektorit të ndërtimit dhe se, sipas tij, DASH i ka dhënë direktivë SPAK-ut të nisë goditjen ndaj trafikut të drogës me mbështetje qeveritare shqiptare.
