Një gjykatë federale e apelit në SHBA ka lënë në fuqi vendimin që detyron Donald Trump të paguajë 83.3 milionë dollarë shkrimtares E. Jean Carroll për dëmtim të reputacionit.
Carroll e paditi Trump pasi ai e mohoi publikisht akuzën e saj për përdhunim në vitin 2019. Në janar 2024, një juri vendosi në favor të saj, ndërsa ish-presidenti kërkoi që vendimi të rrëzohej duke pretenduar imunitet presidencial.
Gjykata e Apelit e Qarkut të 2-të në Manhattan e hodhi poshtë këtë argument, duke e cilësuar vendimin si “të arsyeshëm” dhe duke theksuar se juria kishte vepruar drejt, bazuar në provat dhe faktet e paraqitura.
Trump ka mohuar vazhdimisht akuzat dhe i ka cilësuar proceset gjyqësore ndaj tij si pjesë të një komploti politik për ta dëmtuar në fushatën e vitit 2024. Ai po apelon edhe vendime të tjera, përfshirë dënimin penal të majit 2024 për falsifikim të të dhënave për të fshehur një skandal seksual.
