Një sulm me armë zjarri ka ndodhur këtë të premte ndaj një komisariati policie në qytetin e Izmirit, në Turqi, ku për pasojë kanë humbur jetën dy efektivë policie, ndërsa një tjetër ka mbetur i plagosur rëndë.
Ngjarja e rëndë është shënuar në lagjen Balçova, ku sipas mediave vendase, një 16-vjeçar ka hapur zjarr ndaj ambienteve të komisariatit. Autori i dyshuar, i identifikuar me inicialet E.B., është arrestuar nga autoritetet turke. Përveç policëve të vrarë, në vendngjarje raportohet se janë plagosur edhe gjashtë persona të tjerë.
Sipas dëshmitarëve, adoleshenti është parë të afrohet drejt komisariatit i veshur me pallto të trashë dhe me fytyrën e mbuluar, pavarësisht temperaturave të larta. Ai kishte me vete një sasi të konsiderueshme municionesh.
Guvernatori i Izmirit, Süleyman Elban, ka dhënë një deklaratë nga vendi i ngjarjes, ku theksoi se i riu është plagosur gjatë ndërhyrjes së policisë dhe ndodhet nën kujdesin e mjekëve në Spitalin Shtetëror të Alsancak.
“Sulmuesi u arrestua me lëndime. Ai po trajtohet në spital dhe nuk ka precedentë penalë. Hetimet janë në vijim. Dyshohet se armën e ka marrë nga babai i tij, dhe bëhet fjalë për një pushkë me pompë,” deklaroi Elban.
Autoritetet turke vijojnë hetimet për të zbardhur motivet e sulmit, ndërsa ngjarja ka shkaktuar reagime të forta në opinionin publik vendas.
