Shqipëria përballet të martën në “Air Albania” me Letoninë, në një ndeshje vendimtare për kualifikueset e Botërorit. Kuqezinjtë kanë vetëm një objektiv: fitoren dhe tre pikët që do t’i mbajnë në garë për biletën drejt turneut më të madh të futbollit.
Në konferencën për shtyp, trajneri i Kombëtares, Sylvinho, u shfaq optimist dhe i qartë për rëndësinë e përballjes.
“Sigurisht që do të jetë një ndeshje kyçe. Ndeshjet për të shkuar në Botëror janë gjithmonë të vështira. Dy ditë më parë pamë Letoni–Serbi, ishte një ndeshje e fortë. Në futbollin modern, rezultate si 6-0 ndodhin rrallë, vetëm ekipe të mëdha si Spanja mund t’i arrijnë. Më vjen keq ta them, por ne nuk jemi në atë nivel,” tha tekniku brazilian.
Sylvinho analizoi kundërshtarin, duke e cilësuar Letoninë si një ekip fizik dhe të fortë në goditjet standarde. Ai foli edhe për eksperimentet në miqësoren e fundit me Gjibraltarin, ku aktivizoi lojtarë të rinj:
“Doja t’i shihja. Tu kërkosh fitore me rezultat 6-0 është e vështirë. Prisja më shumë, por kjo ishte pjesë e përgatitjes.”
Tekniku theksoi se skuadra është në një moment të mirë, pavarësisht presionit:
“Kur e ke gjithçka në dorë vetë, është një moment pozitiv. Më shumë shqetësohem për lojtarët që kanë ndërruar ekip apo trajner sesa për ata që nuk janë në listat europiane. Nuk jemi në nivelin për të zgjedhur gjithmonë lojtarë që luajnë rregullisht në klube. Ka raste që kam marrë lojtarë që nuk kishin minuta, por kjo nuk më shqetëson.”
Shqipëria do të kërkojë të shfrytëzojë maksimalisht mbështetjen e tifozëve në “Air Albania”, në një sfidë ku vetëm fitorja vlen.
