Është kryer për herë të parë në Shqipëri autotransplanti i palcës së kockave. Ndërhyrja është realizuar nga mjeku i njohur Arben Ivanaj dhe ekipi i mjekëve të shërbimit të Hematologjisë, në QSUT.
Lajmin e ka bërë me dije vetë shefi i shërbimit të Hematologjisë, Prof. Arben Ivanaj, i cili përmes një postimi në rrjetet sociale, ka falënderuar publikisht pacienten, si dhe të gjithë kolegët që asistuan këtë ndërhyrje komplekse.
“Realizohet për herë të parë në Shqipëri autotransplanti i palcës së kockave (autologous stem cell transplant) në Shërbimin e Hematologjisë QSUT “Nënë Tereza” (ndonëse me vonesë në raport me vendet e tjera). Falënderimet e para shkojnë për të sëmurën dhe familjen e saj. Mirënjohje bashkëpunëtorëve, Dr. Anila Dukaj, Dr. Valentina Semanaj, Dr. Teuta Dedej,” shkruan mjeku i Ivanaj.
Autotransplanti i palcës së kockave është një procedurë në të cilën qelizat staminale të shëndetshme të një pacienti (qelizat formuese të gjakut) mblidhen nga gjaku ose palca e kockave para trajtimit me komioterapi, ruhen dhe më pas i jepen përsëri pas trajtimit.
Një transplant i qelizave staminale zëvendëson qelizat staminale të pacientit që u shkatërruan nga trajtimi me rrezatim ose me doza të larta të kimioterapisë. Ky lloj transplanti përdoret më shpesh për të trajtuar kanceret e gjakut, si leuçemia dhe limfoma.
