Gazetari Basir Çollaku, ka komentuar publikimin nga Departamenti i Drejtësisë i SHBA-së të dosjes për ish-agjentin e FBI-së, Charles McGonigal, ku sipas tij shfaqet drejtpërdrejt kryeministri Edi Rama.
Në Syri Tv, Çollaku deklaroi se publikimi i dokumenteve prej 23 faqesh sjell në vëmendje lidhje me rusë, kinezë dhe amerikanë të korruptuar, ndërsa “në të gjitha këto degëzime shfaqet edhe kryeministri i Shqipërisë”.
Ai theksoi se Rama del në këtë dosje përmes marrëdhënieve me oligarkë, tendera publikë dhe kontakte me figura të sanksionuara ndërkombëtarisht.
Sipas Çollakut, Struktura e Posaçme kundër Korrupsionit dhe Krimit të Organizuar (SPAK) ka treguar mosveprim, pasi edhe pse dosja është regjistruar që në janar 2022, për gati katër vite nuk është thirrur apo marrë në pyetje asnjë nga personat e përmendur, përfshirë kryeministrin Rama.
“Ky mosveprim përbën edhe elementë të veprës penale. Nuk ka transparencë nga SPAK mbi hetimet, as mbi letër-porositë. Nuk mund të presin që Departamenti i Drejtësisë ta ripublikojë çështjen”, tha ai.
Çollaku shtoi se vizitat e kreut të SPAK, Altin Dumani, në SHBA lidhen vetëm me këtë çështje, si pjesë e një shkëmbimi informacioni me partnerët amerikanë, të cilët kanë investuar miliona dollarë në reformën në drejtësi në Shqipëri.
