Shqipëria vazhdon të përfshihet nga skandalet ushqimore, por deri më tani askush nuk ka mbajtur përgjegjësi. Në Shqipëri nuk merret vesh se çfarë konsumojnë shqiptarët, por rastet evideonten kur shtetet e tjera bllokojnë dërgesat me produkte nga vendi ynë, të kontaminuara me lëndë të dëmshme për shëndetin.
Rasti më i fundit ishte në Kroaci, ku u bllokua një ngarkesë me pjeshkë, të cilat kanë rezultua të kontaminuara me metale nikeli, mbi normën e lejuar. Këtë fakt e konfirmon edhe Autoriteti Kombëtar i Ushqimit (AKU), teksa bën me dije se bëhet fjalë për një sasi prej 5562 kilogramësh.
AKU thotë se pjeshkët janë asgjesuar në Kroaci, teksa janë ushtruar kontrolle në magazinat e eksportues dhe nuk ka patur gjendje të produktit. Sipas AKU-së, nga verifikimet ka rezultuar se i gjithë produkti është dërguar për eksport dhe nuk është shpërndarë në tregun vendas.
Reagimi i AKU-së:
Më datë 22.08.2025, Shqipëria është njoftuar nga Sistemi RASFF, në kategorinë Njoftim për refuzim në kufi me numër reference 2025.6367 me temë: “Nikel në pjeshkë me origjinë nga Shqipëria”, të njoftuar nga Kroacia.
Nga analizat e kryera në shtetin kroat, është konstatuar prania Nikel mbi normën e lejuar.
Menjëherë pas marrjes së njoftimit, rasti i kaloi për ndjekje strukturave të Drejtorisë Rajonale të AKU Fier.
U krye inspektim në OBU eksportues, ku rezultoi se nuk ka gjendje të produktit në magazinat e tij.
Subjekti disponon sistem gjurmueshmërie, ku u verifikua se produkti është dërguar i gjithi për eksport dhe nuk është shpërndarë në tregun vendas.
Sasia prej 5562 kg pjeshkë janë dërguar drejt Kroacisë, ku dhe janë asgjëuar pas rezultatit të analizës laboratorike. Rasti iu referua dhe AKVMB për masa të mëtejshme.
AKU ka bërë edhe njoftimin përkatës mbi rezultatet e verifikimeve në kategorinë e njoftimeve RASFF.
