Shqipëria po përballet me një situatë shqetësuese në fushën e sigurisë ushqimore, ndërsa qeveria mbetet e heshtur dhe pa kontrolle efektive.
Sipas Sistemit të Alarmit të Shpejtë për Ushqimin (RASFF), Kroacia ka bllokuar së fundmi një ngarkesë pjeshkësh nga Shqipëria për shkak të përmbajtjes së lartë të metaleve të rrezikshme. Ndërsa disa muaj më parë Greqia ka refuzuar mandarina për nivele të larta pesticides.
Problemet e eksportit nuk përfshijnë vetëm këto raste. Raste të tjera problematike përfshijnë speca me mbetje insekticidi formetanate, klementina me pesticide të larta dhe sheqer palmë me sulfur dioxide mbi limitet e lejuara.
Nga viti 2019 deri në 2025, RASFF ka nxjerrë gjithsej 69 paralajmërime për eksportet shqiptare, duke treguar një problem të qëndrueshëm në kontrollin e produkteve bujqësore.
Por shqetësimi nuk ndalet vetëm tek eksportet. Disa muaj më parë qytetarët u alarmuan pasi në tregun shqiptar u shpërndarë fileto pule të importuara nga Brazili, të kontaminuara me salmonelë.
Sasia totale e fileto pulës nga kompania ‘AMG Food’, e shpërndarë me markën ‘Dimal’, ishte rreth 18.3 tonë. Vetëm 5.2 tonë u bllokuan, ndërsa pjesa më e madhe, rreth 13.1 tonë, kishte dalë në treg për konsum.
