Një shqiptar i dënuar për shfrytëzim prostitucioni vijon të qëndrojë i lirë në Mbretërinë e Bashkuar, pavarësisht një urdhër-arresti ndërkombëtar.
Daily Mail shkruan se Gëzim Troka, 50 vjeç, u shpall fajtor në mungesë nga një gjykatë shqiptare në vitin 2008 për përdorimin e dhunës dhe kërcënimeve ndaj të dashurës së tij, të cilën e detyroi të punonte si prostitutë në Greqi dhe Itali.
Megjithëse ishte në kërkim, ai arriti të hynte në Britani me një pasaportë të dyshimtë bullgare dhe nuk u vu re nga autoritetet për më shumë se një dekadë. Në vitin 2018 u arrestua dhe kaloi tre vjet në paraburgim, por pas dështimit të apelimit të tij në Gjykatën e Lartë në 2021, ai u la i lirë me kusht në gusht 2024.
Sipas medias britanike, Troka sot lëviz i lirë në vend dhe zyrtarët shqiptarë po shqyrtojnë mundësinë e tërheqjes së kërkesës për ekstradim, pasi kanë kaluar gati dy dekada nga dënimi i tij.
