Nga Boldnews.al
Kryetari i Gjykatës së Lartë, Sokol Sadushi, duket se ka arritur ta vetëpërmbajë vrullin e shprehur më herët në zyrat e tij për të mbyllur procesin e plotësimit brenda muajit Gusht 2025 të vakancës së Gjykatës Kushtetuese të krijuar nga përfundimi i mandatit të gjyqtares dhe njëkohësisht drejtuese e atij institucioni, Holta Zaçaj.
“Boldnews.al” ka raportuar më herët se Sadushi, në cilësinë e kryetarit të Këshillit të Emërimeve në Drejtësi (KED), kishte planifikuar që, rreth javës së tretë të gushtit, të shqyrtohej raporti i verifikimit për Denar Bibën, aplikantin e fundit për vakancën e Zaçajt.
Por, duket se nuk ka gjetur mirëkuptimin e anëtarëve të tjerë të KED-it, të cilët nuk kanë preferuar të ndërpresin pushimet verore për të plotësuar trillin e Sadushit.
Ky i fundit, i gjendur përballë refuzimit të shumicës së anëtarëve të Këshillit të Emërimeve në Drejtësi, u përpoq që të shuante çdo dyshim për “nxitimin” e tij, duke u shfaqur publikisht në 25 Gusht 2025, në një aktivitet kulturor në fshatin e tij të lindjes, Vajzë të Vlorës. Madje, duke u konsideruar edhe si “organizator” festivalit “Vajza Fest”, një rol që nuk i shkon aspak, as profilit dhe as profesionit të tij.
Megjithatë, sapo Gushti përfundoi, Sokol Sadushi nuk priti asnjë ditë më shumë për të ri-aktivizuar vrullin e tij për të mbyllur një ditë e më parë procesin e verifikimit për Denarin dhe, rrjedhimisht, edhe për të zgjedhur menjëherë gjyqtarin kushtetues, i cili do të emërohet nga Gjykata e Lartë, institucion i drejtuar po prej tij.
Këshilli i Emërimeve në Drejtësi (KED) njoftoi këtë të hënë (1 shtator 2025), se do të mblidhet në datën 4 shtator, me rend dite: “Vijimi i procedurës së verifikimit të kushteve dhe kritereve ligjore të kandidimit të z. Denar Biba, në vendin vakant për gjyqtar në Gjykatën Kushtetuese, shpallur nga Gjykata e Lartë e Shqipërisë”.
Biba, “pengesë” e Sadushit
Kryetari i Gjykatës së Lartë, Sokol Sadushi, është vendosur prej disa muajsh në një kurs përplasjeje të fuqishme me Gjykatën Kushtetuese, në tentativë për të rrëmbyer të paktën 3 mandate anëtarësh në institucionit më të lartë të drejtësisë.
Ai po shfrytëzon mandatin e tij një-vjeçar si kryetar i Këshillit të Emërimeve në Drejtësi (KED), struktura përgjegjëse për verifikimin e kandidaturave për në Gjykatën Kushtetuese, për të larguar sa më shpejt kryetaren aktuale, Holta Zaçaj, si edhe për të “rrëmbyer” mandatet e dy gjyqtarëve të tjera-Elsa Toska, e dorëhequr dhe Sonila Bejtja, e cila, sipas procedurave kushtetuese dhe ligjore të emërimit të saj, duhet të qëndrojë në detyrë deri në vjeshtën e vitit 2028.
Gjykata e Lartë, si organ emërtese, shpalli procedurat e kandidimit për zëvendësuesin e Holta Zaçaj, nw janar 2025.
Në përgjigje të asaj thirrjeje, aplikuan 13 juristë: Alban Toro, Alma Faskaj, Asim Vokshi, Denar Biba, Florjan Ballhysa, Genta Tafa (Bungo), Irena Nino, Klodian Rado, Lulzim Hamitaj, Naureda Llagami, Nurihan Meta (Seiti), Rezana Balla dhe Sinan Tafaj.
Gjatë procesit të verifikimit, Këshilli i Emërimeve në Drejtësi skualifikoi nga gara kandidatët: Sinan Tafaj, Klodian Rado, Rezana Balla dhe Nurihan Seiti. Ndërkohë, kandidati Lulzim Hamitaj dha dorëheqjen nga kandidimi.
Në vijim, Këshilli i Emërimeve në Drejtësi (KED), i drejtuar nga Sokol Sadushi, ka vendosur, në periudhën qershor-korrik 2025, kualifikimin e kandidatëve Alban Toro, Alma Faskaj, Asim Vokshi, Florjan Ballhysa, Genta Tafa (Bungo) dhe Irena Nino.
Si kurrë më parë në aktivitetin e KED-it, thuajse të gjithë kandidatët janë kualifikuar, megjithëse ky “rezultat perfekt” shoqërohet me dyshimet për një “manovër” të Sokol Sadushit që të “kap tre mandate kushtetuese vetëm me një procedurë”, siç ka raportuar më herët “Boldnews.al”.
Gjithësesi, procedura për gjetjen e zëvendësuesit të Holta Zaçaj, pavarësisht nxitimit të tepruar të Sadushit, ende nuk ka përfunduar. Shkak për “ndaljen e vrapit” të Sadushit është bërë emri i Denar Bibës, kandidati i fundit, për të cilin ende nuk ka përfunduar verifikimi.
Denar Biba, ish-kryetar i Komisionit Qendror të Zgjedhjeve dhe aktualisht drejtues i Autoritetit të Konkurencës, i emëruar kudo nga Partia Socialiste në pushtet, duket se nuk ka bindur përfundimisht Këshillin e Emërimeve në Drejtësi për ta kualifikuar për postin vakant për në Kushtetuese.
KED-i ka vendosur të shtyjë plot tre herë vendimmarrjen e tij për emrin e Bibës. Në mbledhjen e fundit në radhë, në 30 Korrik 2025, Këshilli i Emërimeve në Drejtësi vendosi “të njoftojë kandidatin z. Denar Biba për gjetjet në lidhje me kriterin e pasurisë. T’i lihet afat kandidatit për të dërguar parashtrime me shkrim të shpjegimeve të tij dhe dokumentacion përkatës, deri në datën 8 gusht 2025”.
Tashmë, pas dorëzimit të dokumentave shtesë nga Denar Biba, Këshilli i Emërimeve në Drejtësi pritet të vendosë përfundimisht për kandidaturën e tij në 4 shtator.
LEXO EDHE:
Kandidate për në Gjykatë Kushtetuese, Naureda Llagami “fsheh” punësimin tek Soros
Skandali në KED/ Genta Bungo probleme me pasurinë, Sokol Sadushi e kualifikoi për në Kushtetuese
